الزواج الثانى ليس عقيدة

قالت : زوجى بيقولى الزواج التانى عقيدة لازم تؤمنى بيها يا اما تكونى كافرة

اما هو عقيدة ليه الرسول لم يتزوج طوال حياة السيدة خديجة مع ان الوحى كان نزل عليه و لا مؤاخذه

وليه رفض ان سيدنا على ابن ابى طالب يتزوج على السيدة فاطمة

وايه الدليل ان الزواج التانى له فضل او ثواب او فرض او اى دليل يدل على كدة

قوليله :

طيب انا عندى استعداد أسلم انها عقيدة لو انت اخدت كل افعال الرسول عقيدة

الرسول صلى الله عليه و سلم كان بياكل بايده و يدخل الخلاء فى الصحراء و ينام على الحصير و يلبس العمامة ..اشمعنى دول مش عقيدة

طب المصطفى كان بيسابق عائشة فى الصحراء و بيوديها تتفرج على عرض الاحباش و بيغازلها و يحط بقه على موضع بقها و كان وكان و كان ..اشمعنى دى مش عقيدة

الزواج التانى لم يرد نص صريح يحث عليه
ماذكر فى القرآن كان فى معرض حل مشكلة اليتامى ...لو تحت رعايتك يتيمة و عايز تتجوزها فممكن مثنى و ثلاث و رباع
و مفيش نص يوحد الله يقولك ان الى بيتجوز تانى دا احسن من الى بيتجوز واحدة بس

فيه فرق كبير اوى بين العادات الاجتماعية و اساليب الحياة الى كانت منتشرة فى الوقت دا و بين السنن الى ليها ثواب او فيها اوامر صريحة

الزواج الثانى عادة اجتماعية اقرها الاسلام و نظمها

من لايقبله فليس فيه خلل فى العقيدة و لا يحزنون