انا مش شايف جوازة ناجحة

أنا مش شايف حواليا جوازة ناجحة يبقى اتجوز ليه ؟؟؟

ماهو مهم نعرف الاول ايه هو الجواز الناجح من وجهة نظرك
للاسف احنا مفهومنا للجواز الناجح غلط

كل الناس قاعدة حوالينا بتشتكى من الجواز و سنينه لان عندهم مشاكل
و مفيش فى الدنيا جواز من غير مشاكل ...الجواز من قديم الازل فيه مشاكل
حتى جواز رسول الله صلى الله عليه و سلم النبى كان فيه مشاكل
المشاكل دى حقيقة مرتبطة بالزواج ..دا أولا

ثانيا : الناس الى بتشتكى من المشاكل انت شايفها ساعة الشكوى بس
بس محدش بييجى يقولك الحمد لله انا سعيد اتحلت المشكلة
و محدش بيقولك انا بقالى يومين انا و مراتى زى السمنة على العسل
و محدش بيحكى عن لحظات سعادة كانت طايرة فيها من الفرحة مع جوزها
و بالتالى انت مش بتسمع الا المشاكل ...زى حالاتى كدة
بس مش بتشوف الجانب الايجابى الجميل من الجواز ..فدا بيديك صورة سلبية غير حقيقية

الى قاعد معاك بيشتكى دلوقت ممكن يروح يصالح مراته و يقضى معاها وقت ممتع و لذيذ و مش هيقولك علشان عيب

ثالثا : مش علشان كل الناس مش سعداء فى جوازهم يبقى انت غالبا مش هتبقى سعيد برده
الشخصيات مختلفة فى قدراتها على انها تعيش سعيدة ..و على انها تكون علاقات سعيدة
ممكن واحد صاحبك زواجه فاشل علشان هو مثلا شخصية زبالة ..
او زوجته طلعت زبالة ...
او هم الاتنين كويسين بس مش عارفين يتفاهموا مع بعض و يبنوا علاقة سوية مع بعض

لو انت انسان كويس و اخلاقك كويسة فى المجمل ...غالبا هتنجح
و لو انت عندك مهارات اجتماعية جيدة ..غالبا هتنجح
و لو كمان عندك مهارات فى فهم المرأة و التعامل معاها يبقى اكيد هتنجح

ما تقارنش نفسك بالآخرين
و حاول تتعلم و تدرب نفسك على المهارات دى من دلوقت بدل ما تعد حاسس بالفشل من قبل ما تبدأ

لو عندك رغبة فى النجاح و بتطور من نفسك علشان تنجح ...هتنجح ان شاء الله