مشكلة تزيد معدلاتها فى الآونة الأخيرة و بصراحة ببقى مش عارفة أقول لصاحبها ايه
مش علشان انا مش عارفة الاجابة
لكن علشان القناعات و الافكار التقليدية المنتشرة فى مجتمعنا و التى تحول دون التفكير المنطقى
أولا : فقدان العذرية ليس معناه انها مش عفيفة ...فيه بنات بيبقى جهل منها وتيجى تمارس العادة السرية عن جهل
و ساعات لحظة ضعف مع حد حبته و تابت و فاقت منها
و ساعات اغتصاب لاتجرؤ على البوح بيه لحد
و البنت الى محتفظة بعذريتها مش معناها انها عفيفة و طاهرة ..عمليات الترقيع و العلاقة الجنسية بدون ادخال معروفة
يعنى الموضوع ملوش دعوة بالعفة و الطهارة
ثانيا : دا خطأ اكيد ...بس دا خطأ حصل فى الماضى قبل ماتعرفك
و مش من حق أحد طرفى العلاقة انه يحاسب التانى على اخطاء حصلت قبل ما يعرفه
نفرض انك كشاب وقعت فى نفس الخطأ قبل الجواز ...عاشرت بنت معاشرة جنسية قبل الزواج
هل كنت هتقول لعروستك حاجة من دى ؟
فطبيعى انها تخبى الخطأ دا على امل انك ما تكتشفوش
و لو كانت فعلا عايزة تغشك كانت راحت عملت ترقيع
بس الى عايزة اقوله انك زى ما هى دارت ماضيها انت كمان بتدارى ماضيك اكيد
ثالثا : قدرتك على انك تستحمل حاجة زى دى و تتجاهلها كانها خطأ قديم بتعتمد على طبيعة شخصيتك
هل انت من النوع العفيف و لا كنت بتلعب بديلك قبل الزواج ؟
لو كنت من النوع الى ارتكب نفس الغلط هيبقى عندك قدرة على تقبل الامر دا
و مفيش حاجة اسمها الولد غير البنت
ادام ربنا العدل الجرم واحد ...و الحد الشرعى فيه زى بعض ..الرجل مثل المرأة و العقوبة الاخروية واحدة
لكن ادام المجتمع الظالم للاسف جرم المرأة ابشع من جرم الرجل و تحسبونه هينا فى نظركم معشر الرجال و هو عند الله عظيم
هل فعلا بتحب مراتك وواثق فيها و الا الشك هينغص عليك عيشتك و عيشتها
لو انت الشك مسيطر عليك و هينغص عيشتك يبقى انفصلوا أفضل .
هل لسة بتحترمها و الا سقطت من نظرك خلاص و هتبدأ تعاملها باهانة و قلة قيمة و قلة ادب ...لو مش هتقدر تتناسى الامر و تعاملها باحترام يبقى الطلاق أفضل
أجل موضوع الطلاق على الاقل سنة و ماتجيبوش اطفال و شوف علاقتكم اخبارها ايه ؟
لو علاقة سوية و ممكن تعيشوا مع بعض سعداء وتتناسى الامر دا بدون احتقار ولا اهانة و لا شك
لو ماقدرتش تكمل بسبب الشك او الاحتقار او سوء معاملتها يبقى طلقها أفضل و أكرم ليها و ليك
ليست هناك تعليقات:
إرسال تعليق