أغلب شكاوى الشباب خلال سنة أولى جواز بتكون الشكوى دى
و أغلب حالات الطلاق خلال الفترة دى بيكون سببها الصدمة فى الآخر
مش لازم التغيير بيكون سببه الغش و الخداع
ساعات بيكون تغيير طبيعى بسبب اختلاف المرحلة
فالحب خلال فترة الحب بس
غير الحب خلال الخطوبة و الاعداد للزواج
غير الحب فى سنة اولى جواز
غير الحب بعد سبع تمن سنين جواز
الانسان بيتغير ...و حبه اكيد بيتغيرفى قلبه و فى طرق التعبير عنه
و هو شخصيته بتتغير مع زياده خبراته و تجاربه
ساعات بيكون الزواج سريع مالحقتش تشوف ردود أفعاله فى المواقف المختلفة و بتتصدم بيها بعد الجواز
زى واحدة فوجئت انه مش عايز يروح معاها للدكتور لمتابعة الحمل
طب انت رحت للدكتور قبل الجواز؟
طب على اى اساس توقعت انه يبقى معاك فى زياراتك للطبيب
واحد يقول مش عايزة تنزل لأمى كل يوم و تشوف طلباتها ..
طب انت اتفقت معاها على كدة قبل الجواز ؟
.طب على أى اساس بنيت توقعاتك انها هتنزل
فالخطوبة السريعة مش بتخليك تعرف الى دامك كويس ولا ردود أفعاله
و عدم المصارحة بما تريده من شريك حياتك بيخليك تتوقع استجابته و بعدين تفاجأ برد فعل مختلف
ساعات بيتعمد احدهما او كلاهما انهم يكونوا كويسين و يداروا عيوبهم و مشاكلهم
زى واحد عصبى او واحدة عصبية بتحاول تمسك نفسها قبل الجواز علشان العريس ما يطفش
او واحد بيشرب مخدرات ...طبيعى انه مش هيقول لخطيبته حاجة زى دى
والا واحدة كان ليها علاقات و فاقدة عذريتها ...اكيد مش هتقول لخطيبها حاجة من دى
ساعات بيبقى عنده رغبة حقيقية فى التغيير فعلا
زى واحد مثلا مدمن افلام اباحية و شات اباحى و كان فاكر ان الجواز هيساعده على الامتناع عن الحاجات دى
والا واحدة مدمنة عادة سرية وكانت فاكرة الجواز هيديها نفس المتعة
و يلاقى نفسه و نفسها رجعت لعادتها القديمة بعد ما اتصدم فى علاقته الجنسية الى ماطلعتش زى الى كان متوقعه
ساعات بيبقى حمل المسئولية التقيل عليهم هم الاتنين بيخلى تفكيرهم كله منصب على المطلوب منهم من مهام و بيبقى فعلا عندهم رغبة حقيقية فى النجاح ..
بس بيخلوا كل تركيزهم على الماديات مصروف البيت و نظام و ترتيب البيت
و يهملوا العلاقة بينهم و بيدخلوا فى دوامة الحياة و مايفوقوش الا على صدمة كبيرة زى الخيانة مثلا
ساعات بيبقى السبب انهم اتجوزوا علشان خاطر يتجوزوا مش علشان يعيشوا سعداء ببعض و مع بعض ..الفكرة دى مش وارده فى ذهنهم اصلا
لانهم شايفين كل اصحابهم تعبانين و قرفانين من الجواز فدا بالنسبة ليهم شر لابد منه
ففكرتهم انهم يسعدوا بعض او انهم يعيشوا سعداء بيحسوا انها رفاهية و مش دلوقت
ولما ييجى وقتها تلاقى خلاص قلوبهم ماتت و مش عارفين يصلحوا العلاقة بينهم
ساعات كل واحد فيهم بيبقى داخل الجواز عايز يغير التانى على مزاجه ...و يطبعه بطباعه
مش عايز يعرفه و يكتشفه و يتقبله
هو عايز يأيفه و يوضبه على ماهو عايز ..فتبقى صراع الديوك
وبدل ما كل واحد يكتشف التانى ...كل واحد عايز يغير التانى
الناس بتتغير مع التغيير فى مراحل حياتها
وبلاش حكاية انا اتصدمت فيه او انا اتصدمت فيها دى
انتوا فى سنة اولى جواز لسة بتكتشفوا بعض ..حتى لو بقالكم حب وخطوبة سنين طويلة
فالحب و كل واحد فيكم فى بيت و دائرة اهتمامات و حياة مختلفة
غير خالص الحب وانتوا فى بيت واحد و فى نفس الدايرة و كل واحد فيكم بيكشف عن افكاره و مشاعره و عقده و كلاكيعه و عاداته و علاقاته و ماضيه و احلامه و حتى جسده و عوراته الجسدية و لنفسية
حاولوا تخلوا سنة اولى جواز دى فترة اكتشاف ..بتتعرفوا فيها على بعض
و أجلوا الانجاب شوية
و بعد سنة كل واحد يعد مع نفسه و يقيم الوضع..هل هيقدر يستمر و الا لأ ؟
ليست هناك تعليقات:
إرسال تعليق