تساءلت على صفحتى الخاصة هل البنت تفضل الشاب الحنون اللطيف المهذب و الا بتفضل الشاب الجاف الغليظ الى كلامه جامد ؟
قالت سماح :
الحنين اللطيف عادة بيكون مع الكل كده واقصد بالكل يعني الستات
يعني يا تاخدي غشيم وتاكلي زفت لوحدك يا تاخدي لطيف وجنتل وتاكلي العسل مع سين وصاد وضاد
اللطيف المنحنح عادة بيكون ثقته في نفسه قليله فبيحب يشوف الحب والإعجاب قي عيون الستات ويحب يمثل انه المثالي اللي الكل بيحسدوها عليه
وعلى رغم من رقته الواضحة الا انه ممكن يكون نرجسي جدا يعني حب نفسه بيخليه يحب يلفت الأنظار ليه وفي نفس الوقت يحب يعيش دور المنقذ للست الحزينة او الوحيدة
هو معندوش حسن ادارة لفلوسه وإلى حد ما متكاسل يحب اﻻستمتاع بالحياة والنوم علشان كده دخله مش كبير جدا ولو حصل بيصرفه بدون تخطيط
اما الكئيب المكشر فده عملي وقوي ومستقيم وموش فاضي لمواضيع الستات وﻻ حتى مراته عايز يحصل فلوس طموح ويحب الانجازات ..ممكن يبص برة بس في حالة واحدة حيستفيد منها حاجة و غالبا بيكون احتياج جنسى و ليس عاطفى
الحل إنك تعرفي نمطه عيوبه ومميزاته وتتقبليها وتستمعتي بايجايياته وتسدي النقص اللي من ورا سلبياته
يعني هو عملي واقعي مش رومانسي ..خلاص انتي عيشي الرومانسية بدون ما تطلبيها منه وهو حيتعلم شوية وكفاية انه حيكون سند قوي ليكي يعتمد عليه ومأمنك ماديا
و لو عاطفى و كلمنجى استمتعي برقته وطيبته واحساسه بيكي وديري شئون البيت المادية انتي واقفي معاه وعلميه المسئولية
قلت : رائع ياسماح
طب لو هندى نصيحة للبنات تاخد مين ؟؟؟؟
قالت سماح :
لو العاطفية اتجوزت عاطفى ..حيضيعوا هما الاتنين ماديا ده غير انهم الاتنين حساسين حيكونوا واقفين لبعض على الواحدة ..
وحياتهم حتكون اغلبها مقموصين وأغلب كلامهم كان المفروض فهم لوحده ..
واصله كان يقصد اصلها كانت تقصد ..
ورغم انهم شخصيتين لطاف وطيبين إلا ان نسبة الفشل حتكون عالية الا لو هى تمتعت بجانب حكيم ناضج او هو قدر يستوعب المشكلة
اما الاتنين العمليين نسبة نجاحهم اعلى ﻻنهم طموحيين ومشغوليين دايما
اهدافهم واضحة حتى احتياجتها العاطفية موش مبالغ فيها
لو هو كفاها ماديا موش هتلتفت كتير للجاتب ده ..
بس ممكن وﻻدهم يفتقدوا المرونة والحنان ..
وممكن لو هى اوفر وعندية هو يتضايق من قوتها زيادة رغم احترامه ليها بس احيانا بيحتاج واحدة اضعف يمارس عليها ال male ego وممكن دى تكون سبب خيانته
بس غالبا الى بيحصل ان الاقطاب المتشابهة تتنافر
في البداية بيحصل انجذاب للمتضادين يعني العاطفي بتبهره القوية بشخصيتها وعقلانيتها وقدرتها على حل المشاكل والسيطرة بتعوض جانب نقص فيه بيفرح بيها ويغرقها كلام حلو وحنية واهتمام ...
بعد الجواز بفترة بيبدأ يشوف فيها انسانة مادية جشعة باردة قاسية موش مقدرة مجهوداته الخارقة من وجهة نظره همها الفلوس والماديات
وهى تشوفه خايب اتكالي كل حياته لاهله وصحابه اي حد يضحك عليه في فلوسه وتبدأ تشوف حنيته ضعف
أما القوي بتلفت نظره العاطفية فى الاول برقتها وطاعتها للاوامر وانوثتها وبعد فترة بيشوفها التصاقية خيالية كسولة معندهاش طموح وﻻ اهتمام بالفلوس اللي تعبان عليها
وهى هتشوفه جشع قاسي اناني بخيل
.........................
رائعة يا سماح
لخصت جزء كبير من مشاكلنا الزوجية
الاتنين الناجحين فى حياتهم الزوجية بيبقوا غالبا عندهم توازن بين العاطفة و المصلحة
وبيبقى فاهم كويس الشخصية الى أدامه مختلفة عنه فى ايه علشان يعطيها ما تحتاجه
و بيبقوا حاسين انهم مختلفين علشان يكملوا بعض و يوازنوا بعض مش ينتقدوا و يتريقوا و يستاءوا من بعض
ومفيش فى النهاية اختيار مثالى ...
كل صفة مهما كانت حلوة فى مواقف ليها جانب سلبى فى موقف آخر
لان السعادة فى هذه الدنيا ليست مطلقة
ليست هناك تعليقات:
إرسال تعليق