بصي مش عارفه مين عاملة ايه خليكي زيها
وانا بدايق وبتعصب وبقعد ازعق او ارد رد وحش مش عارفه ارد اقولها اي
عزيزتى
كان الله فى عونك
هذه النوعية من النساء و ما أكثرهم كل تركيزها فى الحياة على النظر الى الآخرين
وتتعامل مع اولادها بنفس الطريقة
شوف فلان جايب درجات احسن منك
شوف علان فاز فى بطولة كذا افضل منك
شوف الولد كذا بيعمل كذا و انت مابتعملش
شوف البنت الفلانية بتعمل ايه لمامتها و انتى ما بتعمليش
كل حياتها عايشة فى مقارنة بينها و بين الآخرين ...
و التحسر على نفسها انها أقل منهم
و توصل الموضوع لأولادها بحجة انها عايزة تخليهم أفضل ناس
و طول النهار تقارنهم باولاد الأهل و الجيران و الاصدقاء
الام دى بتربى اولادها على ضعف الثقة بالنفس لانه دايما شايف نفسه أقل من الى حواليه
نظرة الطفل لنفسه بتعتمد على نظره ابويه ليه ...
و طول ما الام شايفة كل الاطفال احسن منه هتلاقيه ضعيف الثقة بنفسه جدا
دا غير انها بتزرع فى قلبه الغيرة ولو لقط منها الطبع دا هيعيش حياته فى عذاب لانه دايما شايف كل الناس الى حوليه احسن منه
و ممكن الموضوع يتطور الى الحسد و هى الرغبة الشديدة فى ان الآخرين يفقدوا ماعندهم و كراهية ان تصيبهم نعمة او فرحة
و ممكن الموضوع دا يوصل للأذى ممكن يؤذيهم بالكلام عليهم فى غيابهم بسبب كرهه لهم أو بالكلام المؤذى ليهم بشكل مباشر
و يبان انه بيكره كل الى حواليه و يتآمر على من هو أفضل منه لأذيته
الحاجات دى بتزرعها الام فى قلب اولادها بدوام المقارنة بينهم و بين الآخرين و هى لاتدرى
حبيبتى :
والدتك لا أشك فى نيتها انها عايزة تشوفك أفضل و لكن اسلوبها ينم عن جهل شديد للأسف
أولا : حطى فى قرارة نفسك انك انت ...انت انسانة متفردة عن الآخرين ..لا انت احسن من حد ..و لا انت أقل من حد ...عندك مواهب و قدرات و مميزات و عندك عيوب و أخطاء و مشاكل زى كل الناس
مهم اوى انك تبنى ثقتك بنفسك اولا و تكتشفى مميزاتك و مواهبك و ماتملكيه من صفات و مميزات ممتازة ...لان الام الى زى بيبقى غالبا دمرت ثقة اولادها فى نفسهم
ثانيا : حطى فى بالك انك تكونى انت
لو هى عايزاك تعملى كذا و تعملى كذا علشان تتجوزى ...اوعى تسمعى كلامها
البنات ممكن تتجوز بالتصنع و التمثيل و التكلف ...بس عمرها ما هتكون انسانة سعيدة فى حياتها الزوجية ..
لان شريك حياتها هيتصدم فيها و صدمته هتخليه ينفر منها و يكرهها لما تبان على حقيقتها
الى عايزك يعجب بيك كدة بحقيقتك و طبيعتك
ثالثا : فهمى ولدتك بالراحة فى اوقات الصفاء انك مش هتكونى زى حد ومش هتعملى زى حد
انا زى ما انا ..وانا مبسوطة من نفسى كدة
و لو هتغير هتغير علشان انا عايزة اتغير مش علشان اكون زى حد
فهميها بالراحة ان دوام المقارنة بتؤذيكى و بتخليكى تكرهى نفسك و بتعصبك منها و تخليكى تقولى كلام مش عايزة تقوليه
قوليلها بمنتهى الحزم يا امى ياحبيبتى من فضلك ماعنتيش تقوليلى اعملى زى فلانة و زى علانة ...
لان دا بيحسسنى انى اقل منهم و ممكن اكرههم واكره نفسى
و دا بيعصبنى و يخلينى اتنرفز
و من فضلك انا بحبك و بحترمك و ساعدينى انى ما اتعصبش عليكى تانى لو سمحت
وطبعا هى مش هتبطل من اول مرة
و هتكرر الموضوع تانى ...لان دا ممكن يكون طبع فيها
فلو اتكرر
سيبيها و ادخلى الاودة و ابعدى عنها علشان تكفى اذاك عنها ..و علشان تحس انك متضايقة
و قوليلها تانى نفس الكلام لما تهدى
مرة بعد مرة ممكن ربنا يهديها و تبطل
عزيزتى :
الآباء و الامهات قد يثيرون حفيظتنا بشكل أو بآخر و دا طبيعى جدا و بيحصل من أغلبهم
لكن احنا مأمورين بالرحمة بيهم و حسن الخلق معاهم
و لو ماقدرناش فى موقف ما
على الاقل نمنع اذانا عنهم بانك تسيبى المكان اصلا (ولا تقل لهما أف و لا تنهرهما )
و لما تهدأ ان شاء الله تقدر (وقل لهما قولا كريما )
و ربنا معاك يارب
ليست هناك تعليقات:
إرسال تعليق