قال : بقالى خاطبها سنتين ...كنت بحبها اوى دلوقت حاسس انى معنتش منجذب ليها زى الاول
الحب طبيعى انه يمر بمراحل
المرحلة الاولى مرحلة الاعجاب و يمكن الانبهار و دى بتحس فيها بان الطرف التانى ملاك من السما ربنا باعته ليك
شايف كل الايجابيات
و مش قادر تشوف اى سلبيات
و يمكن تشوف حتى السلبيات ايجابيات
بعد كدة الحب دا بيهدأ
و يبدأ الحب الواقعى و انك تشوف التانى بايجابياته و سلبياته
و تبدأ الخناقات و المعاناة من هذه السلبيات
و فى المرحلة دى بتكون حاسس انك اتخدعت و تبدأ تغنى ظلموه
بس هى فى الحقيقة مفيش خداع ولا حاجة انت الى فقت من سكرة الحب و بدأت تشوف التانى على حقيقته
علاقات كتير بتتفركش فى المرحلة دى
و علاقات بتستمر لما الاتنين بيبقوا على درجة من النضج تخليهم يفهموا ان دا طبيعى
و يبدأ يقيم الشخصية ككل و هل هى تصلح للاستمرار كشريك حياة و الا مش هتنفع بسلبياتها دى
و فيه درجة اعلى من النضج كمان تخليهم يتخلوا عن انانيتهم و يوصلوا لصيغة تفاهم يقدروا بيها يتفاهموا حول النقاط المختلفة و يوصلوا لحلول ترضى الطرفين
و فيه درجة أعلى و أعلى و هو ان كل واحد يفكر يحاول يسعد التانى ازاى
و بدل ما تكون خناقاتهم على مين يفرض رأيه على التانى
يكون تنافسهم على مين هيسعد التانى اكتر..
و دول بيبقى كلامهم هنعمل الى يريحك و التانى يرد لا هنعمل الى انت عايزه
المرحلة الاولى هى الى بيتكلم عليها الشعراء و الادباء و الفنانين و الافلام الرومانسية
و دا قرار القلب
لكن الارتباط و الزواج دا لازم يكون قرار العقل لان العواقب ممكن تكون وخيمة
ليست هناك تعليقات:
إرسال تعليق