حبيبتى
الانسان ..اى انسان ..فى رحلة حياته بيتغير ..بتتغير افكاره و معتقداته و عاداته و مشاعره و ظروفه و رغباته و احتياجاته ...مفيش انسان ثابت
و لو بصينا من ناحية عملية بحتة مفيش انسان فى الدنيا له أمان
حتى أبوك و امك
امك ممكن تتغير عليكى فى يوم من الايام لانك فضلتى جوزك و عيالك على رغباتها و طلباتها و تتغير عليكى اول ما تبدئى تقولى (لأ) لتسلطها و تحكمها
ابوك ممكن يتغير عليكى لانك وقفت أدام رغبته و اتجوزت الى انتى بتحبيه و يقولك عايزة تتجوزيه مع السلامة و ماشفش وشك تانى فى البيت دا
اخوك ممكن يتغير عليكى لو وقفت مع الحق ووقفت فى صف جوزك فى المشكلة المادية الى بينهم
ابنك ممكن يرميك بعد كبر سنك فى دار مسنين
انت نفسك
انت شخصيا
انت بذات نفسك ممكن تكونى سبت اعز صديقاتك لما غلطت فى حقك و بعد العشرة و الحب الكبير اتقلب الى كره و رفض شديد ...وبالتالى هى حست انك مالكيش أمان
عمليا وواقعيا مفيش فى الدنيا انسان له أمان مطلق الى الابد
بمعنى انك تكونى مطمئنة انه هيعد يحبك و يحميك و يكون جنبك مهما عملت فيه حتى آخر العمر
او بمعنى انك تحسى ان حياتك و ممتلكاتك ونفسك آمنة معاه حتى آخر عمرك
الناس كلها بتتغير
و احنا كمان ممكن نتغير
و الحب و العلاقات الابدية دى فى الاساطير و الحكايات بس
علشان العلاقة تستمر محتاجة رغبة قوية من الطرفين انهم مش ممكن هيبعدوا عن بعض مهما حصل بينهم ..
ودى حاجة ممكن تحسى بيها دلوقت و ممكن تتغير بعد سنتين تلاتة
بنشوف قصص حب عاصفة استمرت خمس و سبع سنين و اول ما اتجوزوا كرهوا بعض و اطلقوا
عايزة تحسى بالأمان ؟
الأمان دا من جواك انت .....من نموك الشخصى ..من ثقتك فى نفسك و قدراتك
من قدرتك على مواجهة الحياة حتى لو عشت لوحدك تماما بدون حد تعتمدى عليه
من أمانك المادى و قدرتك على الكسب
من قدرتك على تخطى الآلام و الاحزان حتى لو كنت لوحدك تماما
من احساسك الدائم ان ربنا دايما معاك بحفظه و معيته و لن يضيعك
من قدرتك على التفكير العلمى الصحيح فى حل المشكلات و اتخاذ القرارات
دا لايعنى انك تعيشى فى وحدة بعيدة عن الناس تماما او انك تفرضى عزلة عنهم طالما مالهمش امان
بالعكس تماما
اختلطى بالناس ..وحبى ..و اتجوزى ...و خلفى ...وتواصلى مع الاهل و الصديقات و اعملى علاقات رائعة
لكن دايما حطى فى بالك ان الامان المطلق دا صعب
احبب حبيبك هونا ما عسى ان يكون بغيضك يوما ما
و ابغض بغيضك هونا ما عسى ان يكون حبيبك يوما ما
الناس بتتغير دى حقيقة لاشك فيها
و ياسلام لما تكونى انت مصدر الامان للآخرين
و يحسوا فى صحبتك انك هتفضلى معاهم مهما حصل منهم
عزيزتى :
كل الناس مالهاش أمان لان الناس بتتغير
خلى دايما احساسك بالامان من جواك انت
و ابنى الاحساس الجوانى دا فى اولادك من صغرهم علشان يتشبعوا من الامان الى هو احتياج نفسى اولى فى حياة أى طفل
بالحب و الاهتمام و الرعاية مع تنمية احساسه بالمسئولية و الحرية و الانضباط الذاتى
ليست هناك تعليقات:
إرسال تعليق