شكوى بتيجى من الأمهات و هى فى حالة يرثى لها كما لو ان بنتها عملت مصيبة لا تغتفر
أولا : الحب فى سن المراهقة احساس طبيعى جدا بيحصل لغالبية الشباب و البنات
بيبقى نتيجة انجذاب طبيعى بين الولد و البنت و غالبا بيبقى الانجذاب غريزى معتمد على الشكل فقط فهونى على نفسك لان دا أمر طبيعى لازم توضحيه لبنتك انه بيحصل لكل الشباب فى سنك لكنه غالبا لايستمر مع النضج العقلى و النفسى لكل منهما
ثانيا : اوعى تقوليلها الحب حرام و الا عيب والا قلة أدب و تعدى تلقى عليها دروس فى الاخلاق و الادب ...
الموضوع دا بيخليها تفقد الثقة فى نفسها و تحس ان بدال حست الاحساس دا تبقى هى قليلة الادب و مش متربية و تعد حاسة بالذنب و تأنيب الضمير و تعيش معاناة
او لو هى شخصية عندية ..هتعند و تتمادى فى علاقتها عندا و يمكن تخليها تتهور اكتر علشان تثبت لنفسها انها حرة حتى فى قلة الادب
ثالثا : للاسف يعتمد مسار علاقة الحب دى على علاقة الام ببنتها و هل هى علاقة حلوة يسودها الاحترام و الحب و البنت هى الى جت قالت لامها
والا علاقة متوترة وفيها قدر كبير من عدم الاحترام المتبادل و الام اكتشفت الموضوع بالصدفة
فلو العلاقة اصلا حلوة علاقة الحب غالبا هتنتهى فى اقرب وقت
لكن لكن العلاقة بالأم مضطربة و متوترة هتخلى البنت تترمى اكتر فى حضن الآخر و تتعلق بيه اكتر
رابعا : و برده العلاج هيعتمد على الدرجة الى وصلوا ليها ..هل هى مجرد مشاعر فى القلب من طرف واحد ..و الا هى مشاعر متبادلة بينهم هم الاتنين ..و هل فيه كلام بينهم ؟..هل اتقابلوا من ورا اهاليهم ؟ و اتعمل ايه فى اللقاءات دى ووصلت لأى مستوى
طبعا المعلومات دى مش هتاخديها من بنتك الا لو كانت البنت بترتاح فى الكلام معاك و بتقدر تنفتح عليكى و هى حاسة بالامان
خامسا : الكلام بيكون بمنتهى الهدوء و الاحترام و بتركزى على نقاط محددة
- مشاعر الحب مشاعر طبيعية بتحصل لاى انسان لكن فيه فرق بين المشاعر و بين التصرفات
فيه ناس تصرفاتهم نابعة من مشاعرهم بدون تفكير و دول ممكن يروحوا فى داهية نتيجة تصرفاتهم الغلط علطول
و فيه ناس بيقدروا يتحكموا فى مشاعرهم و تصرفاتهم نابعة من العقل و الاخلاق
و قدرتك على التحكم فى تصرفاتك هى الى بتحدد مدى نضجك النفسى و الدينى
و التصرفات دى هى الى ربنا هيحاسبنا عليها
ففى الحديث ..العين تزنى و زناها النظر ...و الاذن تزنى و زناها السمع ...الحديث
يتضح ماهو الغلط و الحرام بالتحديد
- الكلام العادى بينكم زى اى زميل مفيش فيه مشكلة ..لكن لو استمريتوا فى الكلام مع بعض لوحدكم فترة طويلة هيحصل تعلق ..و التعلق دا بيبقى عامل زى ادمان المخدرات بالظبط ...طول ما انت بتكلمة بيطلع كيماويات المخدرات فى جسمك ...لدرجة انك بتكون عايز كل شوية تكلمه و مايقدرش يمر يوم من غير ماتكلمه
- الحب الحقيقى بيبقى فيه اقتناع ان هذا الانسان أهل لان يكون شريك حياة ..فهل الانسان دا فيه من المواصفات انه يكون اهل لان يكون شريك حياة ...فكر و خليها تقرر
- انا عارفة ان كل البنات الى حواليكى بيحبوا و على علاقات بشباب اما للتسلية واما تعلق واما حب غير ناضج ...و مقدرة انك ممكن تقعى فى هذا الامر و يبقى عندك احساس طب انا ليه معملش زيهم ..سعات ضغط الاقران بيبقى قوى و ممكن كمان تلاقى حد بيشجعك على كدة
لكن الانسان بقوته و تفرده حتى وان اخطأ كل الناس
لايكن احدكم امعة
- الحب زى ماهو ممتع ..لكن الحب بدون وصال مؤلم ..وانا خايفة عليكى من الالم دا حبيبتى ...و خايفة مشاعرك تقودك للغلط
دا قلبك و انت الى لازم تحافظى عليه من الألم
أنا واثقة فيك انك مش هتعملى غلط لانك عاقلة و متزنة
لكن لو حسيت انك مش كدة ...و انك بدأت ترتكبى اخطاء فى حق نفسك يبقى من حقى امنعك
طبعا الكلام دا محتاج يتقال بمنتهى الحب و الاحترام
و لازم البنت تكون واثقة فيك اصلا و بتحس بالامان معاك
لكن لو انتى معرفتيش تبنى العلاقة دى مع بنتك من البداية ...فلا تلومى الا نفسك
ليست هناك تعليقات:
إرسال تعليق