قال : اتفقت انا و زوجتى على ان زواجنا ليس علاقة أبدية و اننا كل فترة نعيد تقييم زواجنا و رغبتنا فى الاستمرار ؟
اتفاق رائع
و اتمنى ان كل المتزوجين يتفقوا مع بعض على كدة و يعيشوا الاحساس دا
أنا شخصيا متفقة مع جوزى على كدة
واننا مش هنعيش مع بعض علشان خاطر الاولاد
ولا هنعيش مع بعض علشان احنا محتاجين بعض
ولو اى واحد فينا فقد سعادته مع التانى يقول علطول و نتكلم فى الموضوع و نحاول نصلح الاخطاء الى حصلت
و لو الاخطاء استمرت و غير قابلة للاصلاح و بدأت تسبب أذى نفسى يبقى الانفصال باحسان
احساس الطرفين ان العلاقة دى ابدية لامفر منها بيخليهم يهملوها تماما و لا يقوموا ابدا برعايتها و لا يتفقدوا مدى رضا و سعادة الطرف التانى و لا يحدثوا اى تغيير من أجل رضاه
و خاصة فى مجتمعاتنا لما المرأة تكون محتاجة للرجل ماديا و اهلها مش هيقفوا جنبها لو اتطلقت و هو عارف و حاسس بكدة فبيبرطع و يبلطج و يفترى
لكن لما يكونوا متفقين من البداية ان هى لو ماحستش بالسعادة من حقها انها تتطلق و هو يحترم قرارها دا مع تأدية كل حقوقها المادية ....هيسعى انه يسعدها و يهنيها
و هى كمان لما تكون حاسة انه مش هيقدر يتخلى عنها لانه بيحبها أو بيحب ولاده اوى فبتلاقيها تتمرع و تستأسد و تسوء فيها ...لكن لو حاسة انه ممكن يطلقها فى أى وقت ..هتحترم نفسها
الموظف لما يكون بيشتغل فى شركة أبوه و عارف ان محدش هيقدر يطرده و يقوله مع السلامة بيبقى غير لما واحد بيشتغل فى شركة عادية عارف انه لو قصّر او كسّل او أخطأ هينطرد بيمشى على الصراط المستقيم
ومع ذلك
فالتهديد الدائم بالطلاق او الزواج التانى دى قلة رجولة و قلة مروءة
و طلب الطلاق فى كل خناقة و كل خلاف دى قلة عقل و قلة أدب
لكن الاتفاق من البداية و انتم لسة عرسان او فى فترة الخطوبة على ان العلاقة دى ليست ابدية
و ان من حق اى حد فيهم مش لاقى سعادته انه يدور على سعادته مع حد تانى
و زى ما بنتفق على تفاصيل الزواج نتفق من أولها على تفاصيل الطلاق لو حصل لاقدر الله
و اننا هدفنا اننا نسعد بعض مش نعذب بعض ..و لو وصلنا الى المستوى دا يبقى الطلاق اكرم لينا و لاولادنا كمان
ليست هناك تعليقات:
إرسال تعليق