أحد أسباب التعاسة الداخلية طريقتك فى التفكير
أحد طرق التفكير المسببة للتعاسة طريقة الابيض و الاسود
انت شايف الدنيا و الناس و كل حاجة حواليك يا اما بيضاء ناصعة يا اما سوداء كحل
ولما تلاقى حد ابيض بيغلط يتحول لاسود علطول
و لما تلاقى مكان جميل و فيه شوية ورق مرميين فى لارض يبقى قبيح
و لما تلاقى موقف رائع و فيه غلطة يبقى فى منتهى السوء
و لو مر عليك حدث سعيد و في وسطه حصلت حاجة تضايق يبقى كله تعيس
الدنيا أغلبها كاروهات و منقط و مشجر ابيض و اسود
الدنيا عمرها ماكانت ابيض و اسود بس
الناس الى كدة بيتعبوا أوى فى حياتهم ...اوى
أحد طرق التفكير المسببة للتعاسة
هو التفكير الذى يعتمد على الحظ
فلان دا نجح بالحظ
فلان دا سعيد فى حياته الزوجية حظه حلو
فلان غنى بالحظ
فلان جاب عربية اخر موديل ياحظه
و نعد ننتظر الحظ الى مش بييجى
التفكير دا بيخليك ناقم على حياتك و على حظك المعاند معاك
و بتخلى فى قلبك حسد للى جالهم الحظ و نقمة عليهم
و دايما عايش حاسس بالظلم
ياسيدى
القانون الالهى بيقول ان انت من يصنع حظك باجتهادك و تعبك و مثابرتك
المؤمن القوى خير و احب الى الله من المؤمن الضعيف
احرص على ماينفعك واستعن بالله لا تعجز
و ان الناس الى عايشين على الحظوظ بيجيلهم الحظ و بعدين بيتأندلوا لان النعمة جايالهم من غير جهد و هتروح منهم لو لم يبذلوا جهد للحفاظ عليها
طريقة اخرى فى التفكير تسبب التعاسة
الانشغال الدائم بما يفكر فيه الاخرون
و اليقين بانه صح
كما لو انه مطلع على عقول العباد
فيه ناس غاوية تقرأ افكار الناس الى ادامها و تستنتج
و بعدين تبنى حكايات و روايات و مواقف بناء على تفكيرها الى ممكن جدا يكون مش صحيح اصلا
و غالبا بتكون افكار سلبية عن نفسه
دى بتكرهنى ...و دى بتغير منى ...و دى بتحقد على
ودا بيحاول يستفزنى ....و دا قاصد يضايقنى .
و ممكن تكون احساس بالذنب انه السبب فيما يشعرون به حقيقة
لو زعلان يبقى انا السبب
او زهقان يبقى زهقان منى
لو غضبان يبقى اكيد انا الى اغضبته
عادة قراءة مافى عقول الناس و قلوبهم دى لعبة متعبة جدا جدا
أحد وسائل التفكير الجالبة للتعاسة الاستخدام الكتير للفظ (لازم و مفروض و ضرورى )
فيه ناس عندهم قواعد و قوانين و اصول فى مخهم فاكرين انها الصح المطلق
و اى انحراف عن القاعدة او القانون يبقى غلط فظيع
فطول النهار تلزم نفسها بما لايلزم
لازم اكون كذا
لازم اعمل كذا
المفروض ما اعملش دا
المفروض اعمل كذا
و تلاقيها حاطة نفسها فى اطار مثالى تلزم نفسها بيه ..و يسبب عليها ضغط نفسى رهيب لو خرجت عن هذا الاطار بنسبة 1%
و ياريت كدة بس
دى تاعبة كل الى حواليها بلازم و المفروض
و طول النهار تنصح و تلوم و تدى تعليمات و توجيهات باللازم و المفروض و دا بيوتر دايما علاقته بالاخرين
على فكرة مش لازم و لا مفروض تكون مثالى
و مش لازم كل حاجة تعملها صح بنسبة 100%
و مش ضرورى ابدا انك تبقى بيرفكت فى كل مجال
و من حقك تعمل غلطات ..فكل ابن آدم خطاء
و من حقك برده تقصر ..عادى
و مش واجب على الاخرين انهم يمشوا على قواعدك ...كل واحد حر فى القواعد بتاعته يحطها بمزاجه انت مش هتمشى الكون على كيفك
أحد طرق التفكير الجالبة للتعاسة أيضا طريقة (الأفورة و الطناش )
تضخيم الامور زيادة عن اللزوم
او استصغار الامور زيادة عن اللزوم
الأفورة بتحسسك ان مشاكلك فظيعة زى الجبل فوق دماغك و مالهاش حل ...
و هى ممكن تكون مشكلة عادية جدا و لو سألت اى حد متخصص او خبرة هيديك حلول ليها بسهولة
طبعا دى بتخلى المشاكل الصغيرة تكبر و لما بتكبر بتبقى هم على القلب فظيع و تخليك دايما عاجز عن رؤية الحلول بتاعتها
و ساعات العكس
استهياف المشكلة و انه يشوفها انها حاجة ماتستاهلش انه يتعب مخه العبقرى فى البحث عن حل ليها او يرهق نفسه فى عمل أى خطوة تحلها
فتلاقى المشاكل تتراكم عليه و تكبر مع الاهمال لحد ما تبقى فعلا مشاكل كبيرة
الموضوعية و الواقعية فى رؤية المشكلة يحطها فى حجمها الطبيعى
من طرق التفكير المسببة برده للتعاسة دوام لوم النفس على حاجة هو ملوش دعوة بيها
و دى انا شخصيا كنت بعانى منها ..و بصلحها و بحاربها
و ساعات للاسف كمان بنديها صبغة دينية
أنا ربنا بيبتلينى بالمشاكل علشان أنا وحشة ...مع ان كل الناس عندها مشاكل الوحش و الحلو
انا وحشة علشان كدة ربنا معطل النصر بالامة الاسلامية كلها ...
و دى اسوأ فكرة ممكن تسيطر على مخ الملتزمين دينيا
جوزى بيخون انا السبب
صحبتى اتغيرت على انا السبب
ولادى مش شاطرين فى المدرسة انا السبب
المدير عصبى انا السبب
البلد مليانة ظلم و فساد انا السبب
الثورة فشلت و انا السبب
دا حتى اسرائيل احتلت فلسطين من 70 سنة و انا السبب
الاحساس المزمن بالذنب دا احساس قاتل للسعادة طبعا
اول ما تجيلك الاحاسيس دى اقف مع نفسك و قل لها انتى بريئة من آثام العالم
حدد مسئوليتك تماما عما حدث بشكل عملى منطقى تماما
و الاجمل انك تاخد خطوات عملية للاصلاح لو انت تحمل جزء حقيقى من المسئولية
من طرق التفكير المسببة ايضا للتعاسة التفكير العاطفى
يعنى بنفكر فى المشاكل بمشاعرنا و انفعالاتنا و دى مصيبة العالم العربى كله
و بنحلها برده بشكل انفعالى عاطفى
يمكن علشان لن نتعلم مهارات التفكير العلمى والمنطقى
فيغلب على تفكيرنا مشاعرنا ناحية الشخص او الموضوع
ودايما أقول
تعاستك كتير اوى بتكون فى طريقة تفكيرك مش فى الظروف المحيطة حواليك
لو واحد عايش فى جنة رضوان و دايما شايف نفسه وحش و شايف الوحش فى الى حواليه عمره ماهيحس بالسعادة
ليست هناك تعليقات:
إرسال تعليق