كنت زمان و أنا شابة فى الجامعة راسمة صورة ذهنية معينة للانسان الملتزم و هو الملتحى أو حليق لاسباب أمنية ...الذى يغض بصره و مش بيكلم بنات ...يصلى الصلوات جماعة ...ويلتزم بعمل دعوى ..و ياريت يكون بيلبس الساعة فى إيده اليمين
و البنت الى لابسة حجاب شرعى واسع ...و صوتها واطى ...و مش بتكلم اولاد ..و بتمارس عمل دعوى ...و بتقول جزاكم الله خيرا يعنى كانت الاهتمام بالمظاهر اكتر
و بعدين لما كبرت شوية الصورة بدأت تتغير و بدأت تاخد شكل أكثر عمقا
اصبح الانسان الملتزم من وجهة نظرى الحافظ للقرآن أو لأجزاء منه ..المثقف دينيا ....الى مخلى بيته سمته اسلامى ..الى بيحضر دروس دينية او لقاءات .. يعنى بدأت اهتم بالثقافة و العمل أكتر
دلوقت أصبح عندى قناعة ان مفيش حاجة اسمها انسان ملتزم وواحد غير ملتزم فيه حاجة اسمها واحد يغلب على (مظهره) الصلاح او يغلب على (مظهره ) الفساد
اصبح عندى قناعة ان الاخلاق اهم حاجة فى تقييم الانسان ...لان دى اصعب حاجة و أصعب من الانتظام فى العبادات المفروضة و التطوعية و أصعب من الانتهاء عن الكبائر والمحرمات المعروفة
و صدق رسول الله صلى الله عليه و سلم ( الدين المعاملة ) و تقييم الاخلاق بناء على تقييم المقربين ليه ..ابوه و امه و اخواته او شريك حياته و ابناءه ..لان حقيقة اخلاقه بتظهر فى البيت مهما حاول التجمل خارجه
الانسان المتدين من وجهة نظرى هو الانسان الخلوق مع الالتزام باركان الاسلام و كفى بها نعمة
ليست هناك تعليقات:
إرسال تعليق