و هو مين و ليه احنا مش بنشوفه و شكله ايه ؟
حبيبى :
ربنا هو الخالق ..هو الصانع للكون دا
فيه حاجات كتير اوى حوالينا صنعها الانسان ...زى الكرسى دا ..زى الترابيزة دى ...زى الساعة دى ..زى التليفزيون ..زى الموبايل
كل حاجة من دى صنعها واحد بنى آدم
كذلك الكون ...ربنا هو من صنعه ..ربنا الى خلق الشمس و السما و الارض و البحر و الشجر و الحيوانات والى خلقنا احنا كمان فهو جل و علا الخالق
و هو كمان مدبر الأمر..يعنى بينظم الكون ..يعنى ربنا الى بيخلى الشمس تطلع الصبح و القمر بالليل
ربنا الى بيخلى الأسد بيعيش فى الغابة و العصافير تعيش على الشجر و السمك بيعيش فى البحر
و هو الى بيرزقهم بالاكل و الشرب
وهو الى بيحفظهم من الشرور
و هو الى بيعلمهم ازاى يطيروا و يعوموا فى المية و يجروا لما يحسوا بالخطر
احنا مش بنشوفه علشان احنا مانقدرش نشوفه
شوف كدة لما تنفخ فى البلونة و ندخل فيها الهوا ...هل انت بتشوف الهوا ؟
لما نحط الفيشة بتاعة المكنسة علشان ندخل الكهرباء فى السلك و تشتغل ..هل بنشوف الكهرباء ؟
حاجات كتير فى حياتنا ممكن مانشوفهاش بس هى فعلا موجودة ..
و ربنا سبحانه تعالى شايفنا فى كل وقت و احنا ان شاء الله هنشوفه لما نقابله يوم القيامة
احنا مانعرفش شكله ايه علشان احنا ماشفناهوش ..
بس هو قالنا فى القرآن انه (ليس كمثله شىء ) يعنى مفيش حاجة من الى خلقها فى الدنيا دى شبهه خالص
ربنا سبحانه و تعالى على كرسى كبيييييير اوى اوى فوق فى السما
هو الى قال لنا كدة برده فى القرآن
ربنا علشان احنا ما نقدرش نشوفه كان بيبعت رسايل لينا كل شوية ..
آخر رسالة بعتها لينا هى القرآن الى احنا بنعد نقراه
ربنا قال لنا في القرآن حاجات كتييير اوى احنا مش بنعرفها و لا بنشوفها
كلمنا عن الملايكة و عن الجنة و عن النار
و كلمنا عن الحاجات الى المفروض نعملها علشان ندخل الجنة و الحاجات الى المفروض نبعد عنها و ممكن تكون سبب فى النار
القرآن دا احنا بنقراه علشان نتعلم ربنا عايز مننا ايه
ليست هناك تعليقات:
إرسال تعليق