حبيبتى :
كنت عايزة أكلمك فى موضوع مهم خاص بيكى و هيحصل ليكى فى أى وقت ..انت ماشاء الله عليكى جسمك بيكبر و يبدو انك قربت
فيه فى جسمنا مواد معينة اسمها هرمونات ...الهرمونات دى الى بتخلى جسمك بيكبر ..صدرك بيكبر ...بيطلع لك بعض الشعر فى اجزاء معينة ...و بتحصل حاجة اسمها الدورة الشهرية
الدورة الشهرية دى عبارة عن دم بينزل من فتحة قريبة من فتحة البول كل شهر و بيعد حوالى خمس أيام ..كل شهر
انتى ممكن تلاقيها فى أى وقت خلال الفترة الجاية فى هدومك الداخلية ..مش عايزاكى تقلقى منها دى حاجة بتحصل لكل البنات و الستات
ممكن تحسى قبلها ببعض المغص فى اسفل البطن ..ممكن تحسى انك متنرفزة و عايزة تعيطى او تتخانقى من غير اسباب واضحة ..و بعدين بتنزل
بنستخدم فوط صحية الى انتى شفتيها قبل كدة فى الحمام و قلتلك عليها قطن ..بتحطيها بشكل معين هقولك عليه و تغيريها كل شوية ل لما تتملى
خلال الفترة دى مش بنصلى و لا بنصوم ...الصلاة مش بنعيدها تانى لكن الصيام بنعيده تانى ..و دى رحمة من ربنا بينا لانه يعلم اننا بنكون تعبانين خلال الفترة دى
لما بتخلص و تتأكدى ان معدش خلاص فيه دم ..بنستحمى علشان نرجع نصلى تانى
الدم دا ممكن يكون أحمر او بنى او اصفر مش لازم احمر بس و ريحته مميزة هتعرفيها لما تجيلك
الدورة دى بتكون تأهيل للرحم لاستقبال البيبى لما تتجوزى ان شاء الله تعالى ..و لما ربنا يرزقك بيبى ...الدورة دى بتتوقف و الدم دا كله بيروح للبيبى
لكن دلوقت قبل الزواج و قبل الانجاب ...الرحم بينزل الدم دا برة مع تنظيف مستمر
الدم دا بينزل من فتحة جنب فتحة البول ...هى فتحة الجهاز التناسلى و دا الجهاز المسئول عن احتضان البيبى و تغذيته بعد الزواج
أهم حاجة انك ما تتخضيش و لا تخافى لما تيجى
و ما تحسيش انك مكسوفة لان دا بيحصل طبيعى جدا لكل البنات
و انك تقوليلى علشان اقولك هنعمل ايه بالظبط ؟
ليست هناك تعليقات:
إرسال تعليق