قالت : انا عارفة ان ابنى هيكون سعيد لما يطلع الرحلة دى مع اصحابه تبع النادى
بس انا بخاف عليه جدا !!
تشعرالأمهات بالخوف على أولادهم و القلق المزمن فيدفعهم ذلك الى انها ما تبعدش الاولاد عن عينيها أبدا
مايخرجوش لوحدهم رجلى على رجلهم
مايطلعوش رحلات من غيرى لازم تكون عينى عليهم
ما يروحوش يقعدوا عند حد من قرايبهم الثقة كام يوم لانى بتجنن لما يبعدوا عنى
ما أقدرش أسيبهم يسافروا ابدا رحلة او معسكر او تدريب دنا روحى تروح
ألا تعتقدين سيدتى أنها انانية منك انك عايزة تريحى نفسك و تريحى بالك و قلبك على حساب سعادة أولادك
ولادك هيكونوا سعداء جدا مع اصحابهم و انتى عارفة كدة كويس و مع ذلك بتمنعيهم علشان تريحى بالك و تسعدى قلبك انت
دا مش خوف عليهم ..دى انانية
فى سن معين لازم يتفطموا عنك حبيبتى
ماينفعش يفضلوا لازقين كدة فيكى و خايفين من بعدك عنهم دا يفقدهم ثقتهم فى نفسهم
و بيخلى عندهم عدم الاحساس بالامان طول ما انت مش موجودة
بشوف رجالة و ستات متجوزين يقولوا انا فقدت الاحساس بالامان بعد وفاة ابويا او بعد وفاة امى لانه اتعود على الحماية المتواصلة منهم
وبشوف أمهات مش قادرين يبعدوا عن ولادهم بعد ما اتجوزوا ودايما خايفين عليهم و بيتدخلوا فى قراراتهم و اختياراتهم و دا بيعمل للاولاد مشاكل كتيرة اوى فى جوازتهم
لازم يتفطم نفسيا عنك مع الوقت
طلعى ابنك او بنتك رحلات و معسكرات و سفريات خليه يتعود على بعدك و يتحمل مسئولية نفسه
لما يخرج مع أصحابه بلاش تزهقيه بالموبايلات كل خمس دقايق كما لو انه طفل صغير هيتوه
ادى لاولادك الثقة فى نفسهم و جمدى قلبك فحذرك الشديد دا لن يمنع اقدار الله ان تنزل بهم
قاومى أفكارك السلبية الى بتخليك تتخيلى أخطار و سيناريوهات لن تحدث
أولادك محتاجين يحسوا بالثقة فى نفسهم وهو دا المصدر الرئيسى للشعور بالامان
محتاجين يحسوا بالثقة فى المجتمع الى عايشين فيه علشان يقدروا يتواصلوا مع الناس فى أمان
طول ما انت بتخوفى ابنك من الحرامى و العسكرى و المتحرش و الخاطف و أى حد يكلمه ..بيحس مع الوقت ان كل الناس كدة ..و خايف من أى حد لا يطلع كدة ..ولازق فيكى بشكل مش طبيعى و يعانى من اول انفصال عنك لما يروح الحضانة
و يعانى لما ييجى يتجوز او يجيله شغل فى بلد تانية ...مش حاسس بالامان
و يعانى اكتر لما يتوفاك الله
حذرى ولادك و لا تخيفيهم او ترعبيهم بالحديث الدائم عن حوادث الخطف و التحرش ادامهم
بعض الامهات أيضا يشعرون أن أبناءهم ملكية خاصة لهم ..بتوعى
انا الى كبرت و علمت و ربيت
سعادة و نجاح ابنائك فى فطامهم عنك و قدرتهم على اكتساب السعادة و تحقيق النجاح بانفسهم بعيدا عنك مش بمساعدتك
انتى مش هتعيشى لهم طول العمر ...فلا تجعليهم معتمدين عليكى طول العمر
لان دى سعادتك
ساعات كتير الامهات بتكون فى منتهى الانانية عندما يفضلون راحتهم و سعادتهم على راحة ابنائهم و سعادتهم
دا مش خوف عليهم
دى أنانية
ليست هناك تعليقات:
إرسال تعليق