قالت : أحببت شاب عبر الفيس و احسست ان علاقتى بلا أمل فقطعت التواصل معه
و بقالى شهور عديدة و مش قادرة انساه
حبيبتى
محدش هيقدر ينسى حد دخل حياته و ساب ذكرى جميلة و مشاعر طيبة
لكن كل الى هنحاوله التناسى
النسيان انك ماعنتيش تفتكريه اصلا ..و دا مستحيل
التناسى انك تفتكريه لكن لا يصاحب الذكرى الحنين و اللهفة و الرغبة فى اعادة التواصل معه مرة تانية ..
لان دى بتكون لحظات ضعف فيها خطورة كبيرة
قطع التواصل نهائى دى أهم خطوة ..مع مسح كل الكلام الى بينكم نهائى
بعد كدة التحكم فى التفكير فيه
يعنى حاولى تشغلى تفكيرك بنشاط جديد ..بهدف جديد ..بشغل جديد ...بمعارف جديدة .
ادخال شىء جديد فى حياتك بياخد جزء كبير من تفكيرك وبيساعدك على عدم التفكير فيه
لما تفتكرى مميزاته حطى فى بالك ان فيه عيوب و اخطاء كانت خافية عنك ..لانها مدارية خلف الشاشة ..
هو ليس بالصورة الرائعة الى انتى شايفاها ...لانك شايفة بس جزء من الحقيقة
تمارين التخيل بتساعد كتير جدا لمن لديهم القدرة على التخيل
تخيلى انك قابلتيه و حاول يغرر بيكى
تخيلى انك ارتبطتى بيه و اساء اليك اساءة بالغة
تخيلى انه قال عليكى لاصحابه و معارفه كواحدة بيفتخر انه بيتلاعب بها و شوه سمعتك و صورتك عندهم
تخيلى انه نشر الشات الى بينكم و بعته لاقاربك أو اصحابك على الفيس
ماتقوليش هو مش ممكن يعمل كدة
انتى ماتعرفيش الجانب الخفى من نفسيته و شخصيته
ماشفتيهوش وهو غاضب و رغبته فى الانتقام منك
ما تعرفيش اثر قطع التواصل دا عليه ايه ..ازاى بنت ترفضنى ..فيه شباب كتير كدة
كل ما تيجى تفتكريه افتكرى الصورة السلبية دى
التخيل دا بيقلل الصورة الرومانسية الخيالية الحالمة الى انتى راسماها ليه
و بيقلل التعلق و الحنين
و مع الوقت هيقلل حبه فى قلبك و تعلقك بيه
و لو زوديتها حبتين ممكن كمان تكرهيه
ليست هناك تعليقات:
إرسال تعليق