قالت : انتى رومانسية أوى يا دعاء ..بحس انك مش عايشة معانا
شايفة الدنيا حلوة و كل الناس كويسين ..بس الدنيا مش كدة خالص
عزيزتى :
أنا عارفة ان الدنيا مش كدة ..و طول عمرها مش كدة من بداية الخليقة من أول قابيل ماقتل هابيل ...طول عمرها فيه ظلم و قتل و أخلاق واطية و شرور و دمار ..التاريخ بيقول كدة
بس أنا قدرت - بفضل الله أولا و أخيرا - أن أصنع دنيتى الحلوة التى أريدها
بتغيير اتجاه تركيزى و التحكم فى أفكارى و صناعة السعادة لنفسى
يعنى بدل ما كنت طول النهار اقعد ألوم نفسى و أعاتبها على أخطاءها و عيوبها و شايفاها دايما مش كويسة ...
تقبلتها زى ماهى كدة ..و قلت زى مافىّ عيوب فىّ مميزات ...زى كل الناس ...وعادى انى أغلط دى طبيعتى كأنسان
و حاولت أصلح عيوبى الى كانت مؤذية للآخرين زى الحساسية مثلا
بدل ما كنت علطول مركزة على عيوب الناس و اخطاءها ..بركز على مميزاتهم و افعالهم الجميلة ..فشفتهم بشكل احلى بكتير
و بدل ما كنت بتعامل مع أذاهم بسلبية ...
حاولت اقسم الناس الى مؤذى طيب مش خبيث ...و دا بييجى بالمزيد من الحب و التقبل و الاحتواء
و مؤذى خبيث بعدته عن حياتى تماما
بدل ما أنا قاعدة طول النهار أفكر فى مشاكلى قسمتها
مشاكل مالهاش حل ...يبقى مش هفكر فيها تانى خالص و احاول اتكيف و اتعايش معاها
مشاكل ليها حل ...يبقى أفكر فى الحل علطول و ابادر بيه
حتى الفيس بوك ..بدل ما انا ضايفة فرند سلبيين بيجيبولى اكتئاب من بوستاتهم السلبية ووجع القلب الى بيشيروه وبدل منا عاملة لايك لصفحات بشوف فيها المصايب و المشاكل و تعب القلوب يا اهل الله
عملت لهم unfollow و عملت لايك لصفحات ايجابية تبث الايجابية
التليفزيون بحاول الا افتح الا على حاجة تبسطنى ...مش حاجة سلبية تعكر مزاجى
بعدت تماما عن كل ماهو سلبى و يؤثر على راحة بالى و نفسيتى
ولو انتابتنى حالة كئيبة بسبب التغيرات الهرمونية الشهرية او سماع الاخبار او ايذاء من حبيب او تصرف زميل ...أخرج نفسى منها باسرع وقت ممكن بان اشغل عقلى و قلبى بحاجة بحبها
و بدأت أشغل وقتى بنشاطات تسعدنى كنت بتحجج زمان ان مالهاش وقت ..بس حطيت لها وقت و خليت له اولوية قصوى فى حياتى ..
زى القراءة و الكتابة والرياضة و الخروج للطبيعة و أوقات ممتعة مع اسرتى و التواصل مع الاصدقاء و الاهل
حبيبتى :
احنا مش هنقدر نتحكم فى الدنيا الى حوالينا
بس نقدر نصنع دنيتنا الخاصة بينا و نخليها حلوة
صدقينى ..انتى تقدرى تعملى كدة ...و أى حد ممكن يعمل كدة
واول مايعمل كدة هيشوفها فعلا حلوة
و هيلاقى السعادة فيها و هيكون رومانسى
ليست هناك تعليقات:
إرسال تعليق