قال : أنا بحب مراتى بس هى حساسة زيادة عن اللزوم و نكدية نكد سوبر
و بتضايق من تصرفات كتير أنا شايفها انها تصرفات عادية جدا
اتصرف معاها ازاى ؟
عزيزى :
انا عارفة ان الزوجات بتكون حساسة اكترمن تصرفات و كلمات و حتى نظرات الزوج
و فيه زوجات بتتقمص و تزعل فى سرها وماتتكلمش الا لو هو سألها مالك ..و غالبا بيزهأ مع الوقت و معدش بيسأل
و فيه زوجات بتكون شديدة النقد و مش بتفوت و بتقول على كل حاجة بتضايقها و بتتكلم ..فبيحس مع الوقت انه انسان فاشل لان كل تصرفاته غلط
و فيه زوجات بتعتبره ارتكب فاحشة و مقتا و ساء سبيلا و كل حاجة تعمل عليها خناقة و زعلة و خصام
وعارفة ان دا بيستفز الرجالة جدا لدرجة انهم خلاص بيوصلوا لدرجة انهم بيسيبوهم يخبطوا دماغهم فى الحيط دون مراعاة لمشاعرهم
بس دا للاسف هيجلب لبيتك التعاسة و النكد طول الوقت
انا رأيى اننا علشان نحل المشكلة دى نعمل لستة بالتصرفات الى بتضايقها
و نشوف هل عندها حق و الا مش عندها حق ؟
والمعيار الى هنعاير بيه علشان نكون عادلين انك تسأل نفسك ..لو هى عملت التصرف دا أنا هتضايق و الا لأ ؟
على سبيل المثال :
التصرفات التى تثير غيرة زوجتك ..زى تعاملاتك مع الجنس الناعم مثلا
نظراتك و كلامك و الشات و الموبايلات و الهزار و الضحك و غيرها من التصرفات الى انت شايفها عادى
و اسأل نفسك بحق ربنا و اسأل ضميرك
هل هى لو عملت الحاجات دى مع واحد غريب انت هتضايق و الا لأ ؟
المبادىء سيدى لا تتجزأ و الغلط واحد للاتنين
مش علشان انت معتقد ان الراجل غير الست يبقى اعتقادك دا صح ..
دا اعتقاد غلط ...
لان الغلط غلط سواء صدر من راجل أو من ست
و الى ممكن يضايقك هيضايقها برده
يبقى الحل بالعقل كدة انك توقف الحاجات دى..لو انت عايز تحلها بجد
فيه تصرفات تانية ممكن مايكونش فيها ليها حق ...
زى مثلا علاقتك بوالدتك و اخواتك البنات و أهلك
هى ممكن تغير منها برده
بس حلها انك تهتم بيها اكتر و تكون عادل بينكم
يعنى الوقت الى بتعد فيه مع والدتك و اخواتك يبقالها وقت زيه
لو اشتريت ليهم حاجة ..تشتري لها زيهم
لو بتساعدهم و تقف جنبهم لما يحتاجوك ..كن معاها كدة برده
الغيرة من الأهل بتيجى من عدم العدل بينكم و احساسها انك بتديهم من نفسك ووقتك و مالك اكتر ما بتديها
و هكذا فى كل تصرف هى بتضايق منه
فكر فيها كدة بالعقل و اسال نفسك بأمانة و ضمير
هل التصرف دا فعلا غلط ؟و الا هى مزوداها
و لو مزوداها حط لها حلول عملية و بادر بالحل
دا و عندك ارادة الحل و حاسس ان بايدك فعلا الحل و عايز تحل
لكن لو انت عايز تكبر دماغك و تتجاهلها أو تعند معاها اكتر و تحاول تعودها على طبايعك
هى ممكن مع الوقت تسكت خلاص لانها يأست منك ..
بس عمرها ما تديك السعادة و السكن و الاحتواء الى انت عايزه
لان الاحتواء دا عايز قلب صافى غير مجروح و انت بتتجاهل جراحها بل و بتزيدها أو بتخليها مزمنة
للأسف أسهل حاجة بتعملها الرجالة الطناش ..و انه يهرب من المشكلة الى اصحابه و هواياته و اهله و اى اهتمامات ليه و يسيبها تخبط دماغها فى الحيط علشان تتعود
هى مش بتتعود ..هى بتعد تكوم و تخزن لحد ما بتنفجرو عمرها ما هتسعدك
سعادتك فى بيتك بيدك ..انت من يصنعها
ليست هناك تعليقات:
إرسال تعليق