فيه نوعيتين من الشخصيات عكس بعض
فيه شخصية المحارب
و فيه شخصية المسالم
المحارب دا فاكر ان الدنيا حرب ...معركة ...اى تحدى يواجهه فى حياته بتكون بالنسبة ليه حياة او موت ..يا فايز يا خاسر
الشخصية دى بتلاقيها تحب اوى الالعاب التنافسية زى الكورة و ينفعل ليها جدا
و ممكن يميل كمان للعنف ..يعنى يحب المصارعة و الملاكمة و الالعاب الى فيها ضرب
حتى ألعاب البلاى استيشن و الفيس يميل الى الالعاب دى
ويميل الى أفلام العنف و الاكشن و الضرب و القتل
يعشق الانتقام و يصعب عليه انه يسامح
بيحب اوى الصراعات السياسية و يخوض حربا من اجل التيار الذى يؤيده و يعتبرها معركته الشخصية
مشاكل العلاقات بالنسبة ليه برده معركة لازم يطلع فيها هو الفائز
فى أى نقاش لازم يكون له الرأى الاخير و يستمر فى المعركة لحد ما التانى ينهك و يسكت ليعلن فوزه و نصره
و فيه الشخصية المسالمة
فاكر ان الدنيا ناس بتحب فى بعض ...عايز يعيش فى سلام دائم
حتى ممكن يهرب من تحديات الحياة خوفا من مواجهتها
الشخصيات دى بتميل الى الالعاب الهادية ..
بيحب الافلام الرومانسية و الانسانية و الاجتماعية
سهل أوى يسامح و لا يحب السياسة و صراعاتها ولا الكورة و صراعاتها
ولا اى جو فيه صراعات و مشاحنات و يهرب منها
ما بيحبش المشاكل و يهرب من الشخصيات الى غاوية مشاكل
مشاكل العلاقات بالنسبة ليه أزمة كبيرة دايما بتنتهى بالتنازل عن حقه علشان يحافظ على التانى
لما اتنين محاربين بيتجوزوا ...بتتحول البيت الى حلبة صراع
لما واحد محارب يتجوز واحد مسالم ....الموضوع ممكن يمشى ...بس بييجى على المسالم وقت بيفيض فيه و ما يقدرش يقدم تنازلات بعد كدة
و البيت يبقى قابل للانهيار فى اى وقت
الا لو المحارب رفع الراية البيضاء من أجل أن يعم السلام فى بيته و بطل تفكير لازم انتصر عليك
لما اتنين مسالمين بيتجوزوا بعض ...غالبا بتكون العلاقة أكثر استقرارا و اكثر نجاحا ...
بس بتلاقيهم هم الاتنين تعبانين من الدنيا و مشاكلها الى دايما بيهربوا منها هم الاتنين
الاتنين مش وحشين ولا الاتنين كويسين
الاتنين مختلفين
ولكل منهم مميزاته و عيوبه
بس المهم تتفهم الاختلافات دى علشان تقرروا هتتصرفوا معاها ازاى
ليست هناك تعليقات:
إرسال تعليق