قالت : ابني عنده 6 سنين عنيد جدا في تلقي الأوامر..فلما بعاقبه لما ماينفذش الامر بيغضب اني عاقبته وبيرفض ينفذ العقاب ويقعد يزعق ويكسر في الحاجات فمش بعرف اتصرف في الحالة دي
فى لحظات الصفاء
هتكلم معاه بمنتهى الهدوء عن سلوكه وقت الغضب ...
و هشوف رأيه هو ايه فى نفسه ..و هسمعه و اشوف مبرراته و هو ليه بيعمل كدة ؟
سماع الابناء مهم جدا علشان تعرفى فى مخه ايه و بيعمل كدة ليه ؟
الاوامر :
للاسف الشديد احنا الامهات عندنا هواية القاء الاوامر ..افعل و لا تفعل
و عايزين أولادنا روبوتات تمشى بزراير ..او ياريت بالتاتش زى سمارت فون
الامر لازم تكونى اتكلمتى فيه قبل كدة ...و اقنعتيه هو انا ليه بقولك كدة و بأمرك بالامر دا
ليه بامرك بالصلاة
ليه بامرك بالنظافة الشخصية
ليه بامرك بنظافة البيت
ليه بأمك بالمذاكرة
دى اغلب اوامر الامهات اليومية
وكل ما تلاقى ابنك مش بيلتزم بالامر تحاولى تقنعيه تانى و تالت و رابع و تتكلمى بساليب مختلفة تمس العقل و القلب و الروح
العقاب :
مهم جدا نكون متفقين على العقاب وقت الصفا برده
يعنى انا عايزاك تعمل كذا علشان كذا
ولو حسيت من كلامه انه اقتنع ..هنتفق على عقوبات ساعتها
متخليش العقوبة وقتية
لانه بيحس انها انتقام منه و دا بيخليه يغضب
حبيبى لازم تتعود على انك تعلق هدومك على الشماعة مثلا ..
علشان نحافظ على شكل الاودة جميل و مرتب
و علشان الهدوم ماتبقاش متكرمشة و شكلها وحش
و علشان لو عايز تلبسها تانى سهل انك تعثر عليها
و علشان الملايكة تدخل الاودة لان الملايكة بتتأذى من الفركشة
و علشان نفرق بين الهدوم النظيفة و الهدوم غير النظيفة
المهم بعد محاولات الاقناع هنديله فرصة للتنفيذ
لو لاقيناه بيحاول و بيستجيب ....ومش لازم كل يوم ..لو عملها يوم فى الاسبوع و نسى فى الباقى اذكره بمنتهى الحب و الاحترام
لاحظت انه بدأ يعند و يطنش
نتكلم تانى
انا لاحظت انك طنشت وانا للاسف هفرض عقاب علشان تتعود على الحاجة دى ..و دا لمصلحتك اولا
اليوم الى مش هتعلق فيه هدومك ...هيتخصم ربع جنيه من مصروفك مثلا
و نتفق على العقوبة من قبلها و تتنفذ بمنتهى الصرامة
لو ما عملش ...و اعترض على العقوبة ساعتها ..و راح غضب و كسر
هنكلمه تانى
انا قلت لك ان تعليق الهدوم مهم علشان كذا و كذا
و قلت لك انى هحط عقوبة علشان تساعدك على انك تلتزم
و انت اعترضت و كمان كسرت الحاجة بسبب الغضب
من حقك تغضب لكن مش من حقك تكسر الحاجة
و لو اتكرر الموضوع دا ...هيبقى فيه عقوبة على التكسير بسحب لعبتك المفضلة منك طول اليوم او سحب الموبايل او حرمانك من الخروج اخر الاسبوع
عارفين مشكلة الامهات ايه ؟
انها مش بتخطط ابدا للتربية ..و تربيتها لاولادها بتعتمد على ردود الافعال
هى لو فكرت انها عايزة تغرس سلوك معين فى ابنها
و فكرت قبلها هتعمل ايه فى خطوات محددة
و اتكلمت مع ابنها بمنتهى الهدوء
التربية مش هتكون مجرد ردود افعال
و الاوامر مش هتبان مجرد اوامر تسلطية دى قواعد سارية على الكل لتنظيم البيت
و العقوبات مش هتبان انها ظلم و تسلط و انتقام ..هتبان انها محفزات للمساعدة فى التطبيق
حتى لو الاطفال اعترضوا و غضبوا و دا حقهم ...من حقهم يعبروا عن مشاعرهم بدون اى ايذاء للآخرين ولا للبيت
التربية محتاجة عقل و طولة بال و قدرة على التحكم و السيطرة بالعقل و الحب و الاحترام
ليست هناك تعليقات:
إرسال تعليق