بنتى رغاية

قالت : بنتى عندها خمس سنين بتتكلم كتير قوي قوي ممكن تكلم نفسها أو تقول انها بتكلم صحبتها وزاد الموضوع بقت بتتكلم وهي بتتفرج على الكارتون وتحكي اللي بيحصل لو شفته قبل كده وهي بتعمل حمام وناس زرونا البنت الصغيرة شكت منها وقالت صدعتني قلتلها كده غلط وماتكلميش نفسك تكدب وتقولي بكلم اخويه او بكلمك او صحبتها الوهمية هي بتروح المدرسة بس طول ما احنا في البيت الرغي ﻻ ينقطع

حبيبتى :

لازم أولا تغيرى فكرتك عن بنتك انها رغاية و كذابة ...
البنت موهوبه لغويا و خيالها واسع

للأسف الشديد احنا مجتمعات تقتل المواهب لاننا اصلا مش بنكتشفها بل بنعتبر الموهبة عيب لازم نكبته و نكتم على نفس الطفل علشان يبقى زى الاطفال العاديين ...و يكبر الطفل و يبقى انسان عادى ..ويشتغل شغلانة عادية و يتجوز عادى و يخلف عاديين و تستمر السلسلة
و لا بنطلع علماء ولا موهوبين حقيقيين و لاناس متميزين ...مجتمع يقتل الموهبة و الابداع
حتى فى مدارسنا نفس الجهل و التخلف

بنتك عندها موهبة لغوية حافظى عليها و نميها ..دى ممكن تطلع اعلامية او محاضرة او محامية او معلمة موهوبة و متميزة

اعملى سيرش على الانترنت عن الذكاء اللغوى للطفل و عن سبل تنميته و هتلاقى برامج ووسائل كتير ممكن تنمى بيها الموهبة دى أو على الاقل تحافظى عليها و لا تكبتيها أرجوك

أصحاب المواهب ديما مرفوضين من المجتمع لانهم مش عاديين ....فلا تنهزمى امام انتقاداتهم و خليكى واثقة من قدرات بنتك ومن نفسك ..والعلم و المعرفة هتديك الثقة دى أكتر و اكتر

اما عن الكذب فدا مش كذب
الاطفال قبل سن المدرسة بيكون خيالهم واسع
لاتحكمى علي طفل انه كاذب قبل سن المدرسة
لانه فعلا بيتخيل حد معاه و لايفرق بين الواقع و الخيال