فيه طفل بيعيط بجد و من قلبه و فى صمت ودا بيكون طفل حساس ...بيزعل من حاجات ماتستاهلش الزعل ..فتلاقيه طول النهار بيعيط حتى مع نفسه كدة
دا غير الى بيعيط بصراخ و زعيق و غضب ودا له تعامل تانى
بيبقى ساعات طفل محروم من الحب و الاهتمام ...بسبب والدته المشغولة دايما او المتعصبة علطول بيعبر عن حرمانه بالبكاء الكثير
الطفل دا محتاج حنية و احضان و طبطبة و تقبيل و كلام حلو بالراحة علشان يحس انه محبوب حتى لو عمل حاجة غلط
لما يغلط هو ممكن يعيط حتى من قبل ماتعاقبيه او حتى تكلميه ..
و دا لان ضميره حى و مش بيحب يغلط فدا مش محتاج عقاب لانه لو لقا منك الحب و الاهتمام الى هو عايزه غالبا بيكون طفل سلس و لذيذ و منضبط
و لو عاقبتيه ..عاقبيه و انتى بتعبرى عن حبك ..بلاش شغل العصبية و الشيطنة الى بتطلع عليكى دى لانها بتأثر عليه جدا
لما يكبر فى سن المدرسة كدة تعدى معاه و تقوليله ان من حقك تعيط ..و ان العياط كويس علشان تعبر عن مشاعرك و ساعات بيريح ...
لكن المهم انه مايبقاش الوسيلة الوحيدة لحل مشاكلنا
نعيط براحتنا ..بس نحل المشكلة بعقلنا لان العياط لوحده مش هيحل المشاكل
و كمان حاولى تخليه يفهم سبب العياط
فيه اطفال بتعيط لانها اتضايقت و مش عارفة السبب ايه
اعدى معاه كل مرة يعيط
و حاولوا تدوروا على السبب ..دا بيخليه واعى لنفسه اكتر و بيعوده على مهارة الوعى الذاتى و انه يفهم مشاعره و اسبابها
الطفل البكاء فى صمت طفل حساس ...تعاملى معاه برقة و حنان (طبعا دا العياط الى بجد مش عياط زن و تمثيل ولا عياط مع نوبات الغضب )
هو عايز جرعات حنان و حب زيادة
عايز رفق و لين فى التعامل مع اخطائه
عايز يتعلم انه يكون واعى لنفسه و مشاعره و فاهمها كويس
و عايز يتوازن مع العاطفة باستخدام العقل لحل المشاكل
ودا فى التعامل مع الطفل البكاء الحساس الى بيعيط بهدوء ..و بأكد على النقطة دى
اما التانى البلطجى فدا له تعامل تانى خالص
ليست هناك تعليقات:
إرسال تعليق