هو طفل هادىء ..خجول ...طيب ..بس مشكلته انه سريع البكاء
حساسيته عالية جدا للمواقف من حوله ..و يسهل استثارته ..و يتفاعل مع هذه الاستثارة بالبكاء
و ساعات تلاقيه بيعيط لوحده من غير سبب ظاهرى ...ممكن افتكر حاجة ضايقته ...ممكن تخيل حاجة ممكن تحصل فى المستقبل ...ساعات يكون بيعيط لان اخوه وقع مثلا ...او صديقه فى المدرسة حصلت له مشكلة
عنده رغبة دائمة فى البكاء ..و يثير اعصاب الأم بكثره بكائه
المفروض الام تتعامل معاه بحساسية شديدة ...لانه ممكن يتضايق من اى كلمة او تصرف يصدر منها
الام الهادية العاقلة الحكيمة هتتعاطف معاه و تاخده فى حضنها و تطبطب عليه و تسيبه يتكلم و يعبر عن مشاعره بحرية ..و بعدين هتحاول تهديه
الأم الشعنونة وما أكثرهم ..هتتعصب و تنفعل و تزيد الطين بله ...هتخليه مع الوقت ينعزل و ينطوى و يعد يعيط بعيد عنها تجنبا لأذاها
حساسية الطفل هو مش هيقدر يتحكم فيها فى صغره ...تفهميها و احتويها
و بعد مايهدأ نبدأ نتكلم عن البكاء كوسيلة للتعبير عن المشاعر المتعبة
قوليله من حقك تبكى ..دا طبيعى و عادى
بس ماينفعش كل مشاعر مهما كانت بسيطة نعيط ...
البكاء مش هيحل ليك المشكلة
كل مرة تجيله حالة البكاء ..هنعد معاه و نعرف السبب
لو السبب مشكلة تعرض ليها هنفكر فى الحل..و نشوف التصرف الامثل لحلها ..علشان يتعلم انه يواجه مشاكله بالفعل و التصرف مش بالبكاء
لو البكاء بسبب حد تانى عنده أزمة ..يبقى نفكر مع بعض نساعده ازاى
لو البكاء بسبب احداث من الماضى افتكرها ...يبقى نأكد عليه ان الماضى انتهى خلاص ...و مش هيرجع ..فبلاش تفسد الحاضر كمان بيه
و لو خايف من حاجة فى المستقبل ...يبقى مالوش لازمة الخوف ..لو عملنا كذا و كذا تجنبا للسيناريو الوحش
و لو البكاء من غير سبب و هو مش عارف فعلا السبب نشجعه انه يعد مع نفسه و يحاول يطلع السبب من تلافيف مخه ...أنا كدة بنمى عنده مهارة الوعى الذاتى و التعرف على مشاعر النفس
احترمى مشاعر ابنك ...و تعاملى معاها بصبر ...ربنا يديكوا و يدينا الصبر و طولة البال
ليست هناك تعليقات:
إرسال تعليق