الطفل الرضيع قبل سن السنتين بيبقى حاسس انه جزء من مامته ....بيبقى مرتبط بيها جدا و صعب انه يسيبها ...و الرضاعة كمان بتزود هذه الرابطة
بعد الفطام أو فى بعد سن السنتين ...بيبدأ يستوعب انه انسان مستقل ...و انه ليس جزء من والدته
و الاطفال فى هذه السن أنواع :
طفل بيرفض هذه الاستقلالية و يبدأ يرتبط بوالدته أكتر و يلزق فيها اكتر
و طفل طبيعى يتقبل الوضع بهدوء و انسيابية بالتدريج
و طفل بيبقى عايز يوصل بسرعة لهذه الاستقلالية ....فيبدأ يرفض التعليمات و التوجيهات بتاعت والده ووالدته علشان يفهمهم انه حر و انه بأة كبير ...و انه انسان مستقل ...و هو مايطلق عليه العند
و كتير من المربين بيواجهوا العند دا بعند اكتر و عنف لفظى و بدنى ..بتخلى الطفل يصمم انه يعرفهم انه كبير خلاص ...حتى لو مصمم على الغلط
و التعامل الطفل العنيد هو منحه المزيد من الحرية و الاستقلالية
مش لازم يمشى على التعليمات بحذافيرها ..بعض المرونة هتقلل من حدة العند
يعنى اديلة بعض الحريات ..يلبس ايه ..ياكل ايه ..يلعب بايه ..حسسيه انه بأه كبير ..و انك بتحترمى اختياراته ...و بلاش تتربسى لو حاجة مش خطر
يعنى فيها ايه لما يمسك اى حاجة طالما مش خطر سيبيه يتعرف عليها لان بيبقى عنده حب استطلاع برده فى السن دا
فيها ايه لما يرفض الاكل دلوقت ..سيبيه لما يجوع هياكل
فيها ايه لما يرفض النوم دلوقت ..لما يتعب هينام
بلاش اسلوب العند معاه ...لان الاسلوب دا بيزوده
اديله اختيارات دايما علشان يحس بالاستقلالية ف اتخاذ القرار ...يعنى لو عايزاه يشرب اللبن ...بلاش تقوليله الللبن اهو و لازم يتشرب لانه ممكن يعند
قوليله تشرب اللبن فى الكوباية الحمرا و الا الكوباية الصفرا ...هو كدا هيختار و هيشرب اللبن
لما تكونى عايزاه يخلص أكله ...هناكل فى أى طبق ؟
هتلبس الكوتشى الابيض و الا الاسود
و ساعات العند بيكون للفت الانتباه ...بسبب طفل أصغر منه ..او ام و اب مشغولين عنه دايما ...فهو لاحظ ان العند بيلفت انتباههم ليه و يخليهم يهتموا حتى لو كانوا بيهتموا بشكل سلبى لانه مش عارف ..هو بيحاول يلفت نظركم باى طريقة
و ساعات العند بيكون لانه حاسس انه مفروض عليه حاجة الكبار مش بيعملوها او ممنوع من حاجة الكبار بيعملوها و هو بأة كبير
يعنى ليه لازم انام بدرى طالما الوالدين صاحيين ..طبعا هيعند ...وريه اننا كلنا بنام و طفى الانوار و الكل ينام
مرونتك فى التعامل مع الطفل و منحه بعض الحرية و الاستقلالية هيقلل من نوبات العند بالتدريج ....بس انت خليك مرن و بلاش تتربس معاه ..
بلاش تحسسى ابنك انك متضايقة من عنده ..خليكى كوووول و ماتديهوش الفرصة انه يهزمك و يخليكى تعندى معاه
بلاش تتكلمى ادام الناس انه عنيد و مجننى و هو بيسمعك
بلاش تفرضى عليه حاجات يعملها .او حاجات مايعملهاش كتير ..قللى بقدر الامكان من الاوامر و التعليمات و التوجيهات ..دا طفل مش انسان آلى
ليست هناك تعليقات:
إرسال تعليق