المصروف و الألعاب

سألت صديقة : هل الافضل انى اعطى اوﻻدى مصروف يومى ام اسبوعى ام شهرى 

و عند طلب العاب غالية الثمن لا اريد شراءها
هل الافضل انى اقول اللعبة دى غالية علينا ( مع العلم انى معايا فلوسها بس شايفة ان ده تبذير و وضع النقود فى غير محلها )
ام اقول انى معايا فلوسها لكن ماينفعش حد فى سنك يجيله لعب غالية كدة ( و طبعا هو بيشوف اللى فى سنه عندهم اكتر من كدة )

بالنسبة لموضوع المصروف تدرجى فيه
اديله مصروف يومى الاول ...و لما تحسى انه استقر عليه خلاص اديله نفس القدر اسبوعى

فى الاول ممكن يصرف مصروفه كله فى اول يومين و يقولك انا صرفته و يطلب تانى لان مابيبقاش عنده تحكم فى الرغبة فى شراء كل الى هو عايزه
اصرى تماما و كونى حازمة انك ماتديهوش مصروف بقية الاسبوع
قوليله المفروض تصرف فى اليوم بمعدل كذا لو قسمنا المصروف على عدد الايام
علشان يتعلم يتحكم فى الفلوس الى معاه و مايصرفهاش كلها مرة واحدة و يوزعها على مدار الاسبوع
كدة هو بيتعلم ازاى مايصرفش الا حسب امكانياته ..و هيتعلم يحط اولويات الانفاق

اما بالنسبة للعبة الغالية
قولى الحقيقة لابنك ..انا بصراحة شايفة اللعبة دى غالية اوى
و لو عايزها اوى حوش نص تمنها او ربعه حسب مصروفه ...بحيث يتعلم الادخار لتحقيق هدف
ممكن تزودى المصروف شوية عشان تسهلى عليه الادخار
أو هجيبها لو عملت انجاز ما
حطيله بدائل ممكن يعملها ببذل مجهود زايد
لو جبت مجموع اكتر من 90% لو هو بيجيب اقل فى الترم دا
لو حفظت كذا من القرآن لو بيحفظ قرآن
لو اتقنت الرياضة الفلانية و دخلت الفريق لو بيمارس رياضة معينة
لو حافظت على أودتك مرتبة طول الشهر وحطيله معايير واضحة ليه لتقييم الحجرة 
يعنى حطيله تحدى و تبقى دى هديته على تحقيق الانجاز

هو كدة بيتعلم ان الاهداف لازم يبذل مجهود لتحقيقها و ان الاشياء مش بتيجى بسهولة من فلوس بابا و ماما
و بيحس لما يجيبها بقيمتها فيحافظ عليها لانه تعب فى سبيل تحصيلها