تجرى الام على ابنها اول ما تسمعه بيعيط و هو رضيع و تشيله حتى لو شبعان و مغير مش بستحمل صوته
يطلب منها حاجة فتقول له (لأ ) ...ثم تتراجع لو لقيته حزين ...لانها مش قادرة تشوفه حزين
ما يعرفش يعمل حاجة أو يجيب حاجة فتروح جرى تجيبهاله أو تعملهاله ..لان قلبها بيوجعها لما يحس انه مش عارف او مش قادر
طلباته كلها مجابه من حلويات أو لعب ...وتقول طالما خير ربنا موجود ليه نحرمه ..لانها مش بتستحمل احساسه بالحرمان
عايز يعد فى اول تختة فى الفصل تروح تقعده ..
عايز يعد جنب صاحبه فلان تروح تقعده جنبه ...
عايز يجيب شنطة زى فلان و قلم زى علان و ادوات زى ترتان جرى تجيبهاله
عايزة تجيب فستان زى بتاع فلانه ..وموبايل زى علانة ..يجليها فى الحال
حبيبتى
انتى كدة بتدمريه ...انتى كدة محسساه انه ملك متوج فى هذه الدنيا و كل الى حواليه وظيفتهم اسعاده و راحته و رفاهيته
و دا هدف غلط
احنا بنربى ولادنا علشان نطلعهم يواجهوا الحياة بحلوها و مرها ..بأفراحها و احزانها ...بانجازاتنا و فشلنا فيها ...باحباطاتنا و سعادتنا
الحياة مش هتديله كل الى هو عايزه ...فلازم يتعلم ازاى يسعد بما يملك ...و يرضى ببعض الحرمان ..و يتعرض لبعذ الاحباطات و يتخطاها
هو كدا بيطلع منتظر دايما من المحيطين اسعاده و راحته ..
بيطلع منتظر كدة من مراته فبيبقى اتكالى عليها الى اقصى درجة
منتظرة كدة من زوجها فدايما قرفانة و مش راضية من كتر طلباتهو لانه بيتجاهل طلباتها
منتظر كدة من اصحابه فمش عارف يعمل صداقات لانه علطول محتاج منهم انهم يساعدوه و يسألوا عليه و يقفوا جنبه فى كل وقت و فى كل حين ..
منتظر كدة من زمايله فى الشغل انهم يشيلوا شغله و يعوضوا تقصيره
لازم الطفل يحس بالألم ...و يتعلم ازاى يتغلب عليه
لازم يحس بالفشل ..و يتعلم ازاى يتخطاه
لازم يحس بالاحباط و يتعلم ازاى يتحداه
لزم يحس بالحرمان و يتعلم انه يسعد بما يملك
لما يقع فى الارض ما تجريش عليه ..خليه هو يقوم من نفسه و يصالح نفسه بنفسه ..الا لو اصيب
لما يوقع حاجة والا يكسر حاجة خليه هو يلمها
لو مش عارف يعمل حاجة يتدرب مرة و اتنين و تلاتة لحد ما يعملها بنفسه مع التشجيع و التحفيز المستمر
مش كل طلباته مجابه ..مرة و مرة علشان يتعلم ان الدنيا مش هتوفرله كل الى هو عايزه و يتعود على كدة
لما يفشل و مايجبش درجات ماتعديش تتخانقى مع المدرسين ...لازم يتعلم ان فيه لحظات فشل هنواجهها و يتعلم من غلطاته
لما يغلط يعتذر و يصلح اخطاؤه هو بنفسه
الحنية الزيادة و الرعاية الزيادة هتسعده دلوقت
بس عمره ماهيكون سعيد لما يروح المدرسة و يحس انه مش محور الكون
و لا ان كل طلباته مجابه والا ان اصحابه هيمشوا على مزاجه
افتكرى دايما
هدفك فى التربية مش انك تبسطيه و تسعديه و تريحيه
هدفك تعلميه ازاى يواجه الحياة
ليست هناك تعليقات:
إرسال تعليق