قالت ابنتى : انا حاسة ان اصحابى مش بيحبونى
دايما يسيبونى و يروحوا يلعبوا لوحدهم
دايما بيضايقونى بكلامهم و تصرفاتهم
انا بحب اديهم من الى معايا و هم مش بيدونى
حبيبتى :
انا عايزة اسألك سؤال فى الاول ...انتى رأيك ايه فى نفسك ؟
يعنى هل انتى حاسة انك شخصية مهذبة و ذوق و ممكن تتحبى و الا لأ ؟
انا شخصيا شايفاك انك بنوتة جميلة ..شكلك و عقلك و روحك و مشاعرك تخلى كل الناس تحبك و انا نفسى بموت فيكى
و بابا كمان بيحبك بدليل انه اول ما بيدخل البيت بيبوسك و يسألك عن اخبارك و بيحب يعد يتكلم معاكى و بيحب اوى يخرجك و يفسحك
و اخواتك كمان بيحبوكى و جدو و تيتة و كل اهلنا بيحبوكى
بس حبيبتى فيه فرق بين الحب كمشاعر جوة قلوبنا و بين التعبير عنه
ممكن يكونوا اصحابك فعلا بيحبوكى ..بس هم مش بيعرفوا يعبروا عن حبهم دا صح
ممكن علشان ما اتعلموش دا فى بيوتهم او هى طبيعة شخصيتهم جافة شوية و تصرفاتهم وكلامهم ناشف
ممكن يكونوا مايعرفوش ان التصرف دا بيضايقك او الكلمة دى مؤلمة ليكى و مش واخدين بالهم
ممكن كمان احتمال تانى انك تكونى انتى الى حساسة و بتزعلى من كلام و تصرفات هى عادى بالنسبة ليهم و بيعملوها مع بعض عادى و مش بيزعلوا من بعض
يعنى مثلا لو راحوا يلعبوا قومى معاهم ..مش لازم حد ياخدك من ايدك و يقولك تعالى علشان تلعبى معانا
لو بياكلوا حلويات مش لازم يعزموا عليكى زى ما انتى بتعملى ..فيه ناس كدة متحبش تدى حاجاتها لحد هم احرار ..بس دا مش دليل انهم مش بيحبوكى
لو احتجت قلم و الا ادوات و محدش رضا يديكى عادى ...دا حقهم لان دى حاجتهم .
مش هتقدرى حبيبتى تخلى الناس كلها زيك ..الناس مختلفين فى طبايعهم
لو انتى عايزة تعامليهم بالمثل دا اختيارك و مفيش فيه مشكلة
لكن لو عايزة تحافظى على ذوقك معاهم دا اختيارك برده لكن لا تنتظرى انهم يعملوا كدة معاك لان دا مش لازم
خليكى واثقة من نفسك انك انسانة محبوبة لانك انتى فعلا كدة
المشكلة انهم مش بيعرفوا يعبروا عن حبهم ليكى بالطريقة الى انتى عايزاها ..وهتلاقيهم تعاملهم مع بعض كدة عادى ومحدش بيزعل
و مش كل شوية تزعلى منهم علشان عملوا كذا او تزعلى علشان ماعملوش كذا تقبلى الناس بطبايعهم المختلفة
الا لو غلطوا فى حقك غلط كبير واضح
حب الاصحاب نعمة كبيرة ..حافظى عليها بانك تستحملى شوية غلاستهم و فظاظتهم لان مش كل الناس حساسة و رقيقة كدة زيك
ليست هناك تعليقات:
إرسال تعليق