قالت : انا مخطوبة و بصراحة صفحتك عقدتنى و خلتنى أخاف من الزواج
حبيبتى :
للاسف دى تربيتنا العقلية العقيمة هى الى عملت فينا كدة
بناخد مشاكلنا و مشاكل الاخرين على انها مصدر للنكد و القلق و التوتر ...و ليست مصدر للتعلم
من أروع مهارات التفكير الى اتعلمتها و كانت ليها أثر كبير جدا على شخصيتى بصفة عامة هى توجيه التفكير من التفكير فى المشكلة و اسبابها الى التفكير فى حلول عملية
وان لم يسعفنى التفكير فى حلول بسبب قصورى و جهلى .. ابحث عن حلول ...
اسأل ذوى الخبرة و أهل العلم ..
ثم ابادر بالحل
و اخلى كل تركيزى على الحل بدل من المشاعر السلبية
المشاكل الى انتى بتقريها فى صفحتى ممكن اوى تتعرضى ليها فى حياتك الزوجية ..
اتعلمى منها و دورى على حلول من دلوقت
و الأفضل و الاجمل انك تحاولى تتجنبيها ..
اعملى خطوة ايجابية و اتعلمى بدل ما تكتئبى
دا هيديك ثقة فى نفسك و هيزود احساسك انك قادرة على تجنب المشاكل الى بيقع فيها الآخرين
و انك قادرة كمان على حلها لو وقعت ..و انك قادرة على السيطرة على حياتك الزوجية
بدل ما تتملى مشاعر سلبية تخليكى داخلة على الزواج و انتى متوترة و متحفزة للمشاكل
بدل ما انتى طول النهار انت و خطيبك قاعدين تتكلموا فى الشقة و العفش و السجاد و النجف و المطبخ و الحمام و الفرح و الفستان و الحاجات المادية دى
اتكلموا فى الحاجات المهمة دى و تفاصيلها و اتفقوا هتتجنبوا المشكلة دى ازاى فى المستقبل ..و لو حصلت هتحلوها ازاى
من الافكار المبدعة الى عملتها صديقة لى انها تكتب دستور البيت
فى الخطوبة كانت لما تسمع مشكلة تناقشها مع خطيبها و يكتبوا فى اجندة هيتجنبوها ازاى ..
علشان الكلام يبقى موثق ومحدش يطلع عيل و يرجع فى كلامه
خدى المشاكل بشكل ايجابى و تعلمى بدل ماتاخديها بشكل سلبى و تكتئبى
ليست هناك تعليقات:
إرسال تعليق