الرجال أنواع :
فيه رجل هو طبعه صامت ...يعنى صامت مع الجميع قليل الكلام ...مع اهله و اصدقاؤه ..هو كدة طبعه هادى و محدش يعرف عنه حاجة
و فيه رجل متكلم ...بس صمت بعد الجواز ..و دا له عدة اسباب :
اما ان حياته رتيبة لدرجة ان مفيش فيها جديد يحكى عنه ...فكل الايام زى بعض و مفيش احداث يحكى عنها
و ساعات بيكون عنده مشكلة و هو من طبعه انه يتقوقع على نفسه لحد مايحل المشكلة ..فدا بيبقى صمته متقطع
و ساعات بيكون حبيبتى انت السبب
ممكن تكونى مشغولة دايما عنه و لا تحسنى الانصات مشغولة بشغل البيت و الاولاد و اصحابك على الواتس أب وشغلك و بالتالى بيحس انك مش منتبهة ليه فبيسكت
ممكن تكونى من النوع الى مابيعرفش يسمع أصلا ..رغاية و عايزة تتكلمى انت طول النهار و مش بتعرفي تسمعى و بتقاطعيه كتير
ممكن تكونى من النوع الى بيصدر أحكام على المستمع يعنى تسمع و تنتقد و تلوم و ممكن تسخر يعنى رد فعلك لكلامه غير مريح
و ممكن يكون من النوع الكتوم و انت كل احداث بيتك عند الجيران و الاهل و الاصحاب و هو مايحبش كدة فمعدش بيثق فيكى
الأسباب كتيرة اوى
بس الراجل لما بيسكت دا نذير مش كويس ...لانه بيؤدى الى كتم المشاعر و فقدان الثقة و الانسحاب التدريجى من الحياة الزوجية و بيوصل انه عايش فى جزيرة لوحده وانت مش عارفة عنه حاجة أبدا
اعدى مع جوزك ...و اسأليه الأسباب ..و اسمعى منه بدون رد و تبرير و بدون ماتحسى انه ظالم و مفترى
و بدون ما تحولى القاعدة لخناقة
اعدى لوحدك و فكرى فى كلامه كويس ..يمكن يكون فى كلامه بعض الصحة
ليست هناك تعليقات:
إرسال تعليق