ليه زوجك بيضايق من مرواحك لبيت أهلك ؟
الزوج اول ما بيتجوز بيبقى حاسس انه عامل زى الفارس على الحصان الابيض الى أنقذ الأميرة من قلعة الاشرار ...خطفها على الحصان الى قصره الجميل ليعيش راعيا لها حاميا لها
تخيلى بأة هو عمل مجهود أد ايه علشان يخطفك جاب شقة و شبكة و مهر و قايمة و...و...و.... ...و انت عايزة تروحى تانى قلعة الاشرار !!!!
احساسه انك بتكونى سعيدة فى بيت اهلك اكتر من بيتك احساس متعب ليه ..لان بيديه احساس بالفشل فى اسعادك
احساسه انك كل حاجة بتقوليها لوالدتك او اخواتك ...احساس بعدم الاستقلالية و ان كل اسرارالبيت براه
لما يحس انك مش بتعرفى تفكرى و لا تقررى حاجة و ان كل دماغك مسلماها لوالدتك ...دى ماما بتقول ..و ماما بتعيد ..و ماما رأيها كذا ..و ماما عملت كذا ...هو انا متجوزك و الا متجوز ماما ؟؟؟
و ياسلام لما تروحى بيت اهلك و انت عادية و تروحى تفضفضى لوالدتك و ترجعى مقلوبة عليه و مبوزة ...يبقى اكيد بيقوموكى على
و ياشطارتك لما تروحى لأهلك و أنت موافقة على حاجة اتفقتوا عليها ..و بعدين ترجعى مغيرة رأيك لان ماما أو بابا قالوا وجهة نظر تانية
تفتكرى هو كدة ممكن يحبك تروحى ليهم ؟
تفتكرى مش هيحس ان اهلك شركاء ليه فيكى ..و هيحس انه فى حالة تنافس و حرب معاهم مين ياخدها اكتر ..و هتلاقيه يزرجن كل ما تبقى عايزة تروحى ليهم
حبيبتى
انت الآن زوجة و أم ..بيتك خاص بيكى انت و جوزك ...انتم وحدكم
حاولى تروحى زى ما بترجعى نفسيا ...لان لو رجعت مبسوطة هيبقى انت بتتبسطى اكتر هناك ..و لو رجعت مكشرة يبقى بيقوموكى على
بلاش حكاية ماما بتقول و ماما رأيها دى ....قولى أنا رايى كذا
حاولى تفطمى نفسك عن أهلك بالتدريج ...لانك طول ما انت معتمدة عليهم مش هتتعلمى و لا هتتدربى
ليست هناك تعليقات:
إرسال تعليق