يميل المراهق الى الانزواء فى حجرته اغلب تواجده فى البيت
و بيعمل مشاكل كتيرة اوى مع من يشاركه حجرته من اخواته بسبب هذه الرغبة
هو بيحب ينزوى علشان يفكر لوحده
علشان احساسه بالكسل و دا طبيعى جدا بسبب النمو السريع لجسمه و التغيرات الهرمونية الى بتعمله احساس ان جسمه همدان
تلاقيه بينام كتير اوى
تلاقيه قاعد مع اصحابه طول الوقت على برامج الشات
لاتقلق من هذه العزلة فهذا أمر طبيعى فى هذه المرحلة
لا تقلق عليه و تشك فيه و تقول انه بيحب كدة علشان بيعمل حاجة غلط ساعات الامهات تشك فى بناتها و اولادها انهم بيدخلوا الحمام فترات طويلة و بيشكوا فيهم بجد ..
بس هو لو مفيش له مكان او حجرة خاصة ..
بيبقى الحمام بيت الراحة و الفترة الوحيدة الى بيعد ينعزل فيها ..
علشان كدة بيطول
احترم رغبة ابنك فى بعض العزلة
و لو ليه اخوات صغار يشاركوه الحجرة ..ابعدهم عن الحجرة شوية و اديله فرصته
تفهم هذه الرغبة و قل انه انا عارف انك فى السن دا محتاج تعد لوحدك كتير و علشان كدة انا بحاول اوفر لك هذا الوقت من الخصوصية
الولد لو مش هيلاقى الفرصة دى فى البيت غالبا بيقضيه برة البيت مع اصحابه طول النهار
البنت للاسف معندهاش الفرصة دى للخروج ..فبتلاقيها علطول فى خناق مع اخواتها علشان يطلعوا برة الاودة
قل له انا مقدر رغبتك ..و اسمح لى هدخل عليك كل شوية اطمن عليك
بلاش شغل المفتشين و المخبرين و فتح الباب فجأة علشان شاكة فيه ..احترمه و خبط الاول
بلاش شغل المباحث بانك كل شوية تفتش فى هدومه و اوراقه و شنطه و موبايله و الشك هياكل قلبك فيه ...علشان بيعد لوحده
لو انتوا علاقتكم حلوة مع بعض و اصدقاء هيقولك كل حاجة
لو انت بتحترمه و بتحترم خصوصياته هيحترمك و هينفتح عليك
لكن طول ما انت بتفتش هيتفنن فى اخفاء اى حاجة غلط هيعملها ...و ممكن العند يدفعه انه يعمل الغلط و يخفيه نكاية فيك
الأفضل من التفتيش انك تصارحه بشكل غير مباشر
انا سمعت ان فيه اولاد بيمارسوا العادة السرية ....و دى كذا و كذا
طبعا شباب اليومين دول بيأنتموا و بيمشوا مع بنات ...و نتكلم فى الموضوع
اسمع ابنك اكتر ما تتكلم ....علشان تفهم فى مخه ايه
العزلة دى هتفك مع الوقت ...ما تقلقش
امنح ابنك مايريد كى يمنحك ماتريد
امنحه الاحترام و الثقة علشان يكون أهل ليها
توقف عن التعامل معاه كانه طفل ...علشان يبقى راجل بجد
ليست هناك تعليقات:
إرسال تعليق