كل انسان فى الدنيا ليه احتياجات و رغبات و طلبات من شريك حياته
و احتياجاتنا و رغباتنا مختلفة
زى ما الاجهزة الكهربائية محتاجة كهرباء ..و الزرع محتاج مياة ...و الجسد محتاج أكل و نوم
و فى مجتمعاتنا ..مفيس احترام لرغبات المرأة و طلباتها و احتياجاتها ..و دايما ينظروا الى هذه الطلبات على انها قلة عقل
و فى مجتمعات لاتحترم رغبات المرأة و طلباتها
و فى مجتمعات كل واحد بيحصل على مايريد بالدراع أو بالصوت العالى
وفى مجتمعات محدش ربانا أو علمنا كيف نستخدم سلاح العقققققل وهو أقوى الاسلحة على الاطلاق للحصول على ما نريد
فالمرأة لجأت الى سلاح الزنننننن ودى الست المهذبة الى مش بتلجأ للصوت العالى ....علشان تاخد حقوقها بلسانها
زن الست هى صرخة داخلية بتقولك ..انا محتاجة كذا
حضرتك طبعا لما هى بتطلب حاجة عايزاها ...بتحس انها حاجة مالهاش لازمة (لو احتياجات مادية ) ..او انها هيافة و فضا (لو احتياجات معنوية ) ...
و حشرية و تدخل (لو احتياجات عقلية للمعلومات علشان تفهم )
و لا تعلم ان احتياجاتها غير احتياجاتك
هى ليها احتياجات مادية و عاطفية و عقلية
يعنى زى ما انت بتحب الاكل ..هى بتحب اللبس و الاكسسوارات و البرفانات و الكريمات لجسمها
زى ما انت بتحب الجنس ..هى بتحب القبلات و الاحضان و الطبطبة و التحسيس و اللمسات الرقيقة المحببة الى من غير جنس
زى ما أنت بتحب الكلام فى السياسة ..هى بتحب الكلام فى الاجتماع
زى ما انت بتحب العربيات ....هى بتموت فى الدهب و الماس
زى ما أنت بتحب الكورة ...هى بتحب التسوق
زى ما انت بتحب التحدى ...هى بتحب التواصل
هى احتياجاتها و رغباتها مختلفة
و مهم جدا علشان علاقتك تنجح انك تحترم هذه الرغبات حتى ولو مش مقتنع بيها و باهميتها
مش علشان انت مش محتاجها ..هى كمان مش محتاجاها
ومش علشان هى مختلفة تبقى هى هايفة و معندهاش عقل
لو بتطلب فى وقت غير مناسب ..قل لها ايه الوقت المناسب بتاعك لى ممكن تسمعها باهتمام فيه
لو بتطلب بشكل مستفز ..قل لها اسلوبك دا غلط و بيستفزنى و قل لها الاسلوب الصح و علمها
لو بتطلب طلبات مادية انت مش أدها قلها امكاناتك بالظبط و فهمها علشان تراعى ظروفك
لو بدأت فى الزن و تكرار الطلب يبقى لبى طلبها و ارتاح من الزن
لو انت عندك قناعة ان تلبية طلبات المرأة بتخليها تركبك و تتمرع عليك و انت كدة ماتبقاش راجل فدى قناعة خاطئة ..
مش هتخليك سعيد فى حياتك معاها لان هى مش هتبقى سعيدة لما كل طلباتها مهملة
و زى العربية بالظبط علشان تمشى كويس
محتاجة بنزين علشان تتحرك و تمشى
و محتاجة زيت
و العجلات محتاجة هواء
و محتاجة ماية علشان ماتسخنش
لو اهملت تزويدها بالحاجات دى هتخرب و مش هتمشى ...و حتى لو ماشية بس هتبوظ مع الوقت و عمرك ما هتحس معاها بالراحة و السكن
هى محتاجة فلوس علشان احتياجاتها المادية
ومحتاجة اهتمام علشان احتياجاتها العاطفية
و محتاجة معلومات علشان احتياجاتها العقلية
حط دايما بنزين فى العربية ..و غير الزيت كل شوية ...و ادى الكاوتشات هواء ...علشان العربية تمشى معاك بما يرضى الله و تبطل زنننننننن
بجد تحفة ياريت كلامك يوصل لكل راجل تسلم ايدك
ردحذف