ساعات الخوف الزيادة على الاولاد بيخليهم عرضة أكتر للمصايب و الكوارث
لو خايفة على ابنك من المرض ممكن حرصك الشديد عليه و خوفك الزايد عليه ...
ملبساه حاجات كتير اوى و الجو كويس
خايفة ياكل اى حاجة من برة البيت
عندك وسواس النظافة الشخصية ليه
الخوف الزيادة دا بيضعف مناعته و يخليه عرضه أكتر للامراض
بيخليه جبان عن مواجهة اى موقف صعب فى حياته و بتنقلي له الخوف و القلق دا
و الى بيخليه يسىء التصرف لو تعرض لموقف صعب و يكون عرضة فعلا للاخطار اكتر من غيره
زى واحدة بتخاف تحمى ابنها فى البانيو خايفة عليه من الغرق ومانعاه ينزل الماية فى البحر ومانعاه يتعلم السباحة
دا اول ما ينزل الماية هيكون معرض للغرق فعلا لان معندوش اى خبرة سابقة و ما اتعلمش العوم
واحدة خايفة على ابنها انه يعدى الشارع ...ما اخدش الخبرة انه ازاى يعدى الشارع ..
وهيفضل جاهل انه يعدى الشارع و من اول تجربة هيبقى عرضة للصدمات فعلا
واحدة تانية خايفة علي بنتها انها تكوى هدومها ...اكيد اول ما تمسك المكواه هتتلسع بس هتتعلم بعد كدة بالتدريج
او خايفة انها تدخل المطبخ تحرق او تجرح نفسها ما هى اكيد لو عمرها ما مسكت سكينة هتجرح نفسها
واحدة عاملة رعب لاولادها انهم مايتحركوش من جنبها ...بتخاف يتوهوا او يتخطفوا ...و دول سبحان الله تلاقيهم دايما يتوهوا ...لانهم ما اتعودوش يركزوا على وجود مامتهم فين طالما ماما هى الى واخدة بالها علطول
ساعات الخوف و القلق الزيادة على الاطفال بيخليهم عرضه اكتر للى احنا خايفين منه
و دا بيخلينا نخاف عليهم اكتر و ندخل فى دايرة مفرغة
ومش معنى كلامى انك ترمى ابنك فى المهالك او الاخطار
سيبه يتعلم تحت رقابتك فى الأول
علمه و دربه و سيطر على مخاوفك قبل الطفل ما يكبر و يتمرد و يبقى عنده رغبة انه يجرب بنفسه المخاطر دى و تلاقيه يسرق منك مفاتيح العربية و يروح يخاطر بليلة فى ملهى ليلى و الا غرزة و العياذ بالله
أو أنه يطلع جبان و خواف و شحط فى ثانوى و لسة خايف يسوق العربية و الا خايف يروح الجامعة و منطوى و خايف من مواجهة الناس
مش عتقدر تمنع خوفك عن اولادك ..بس ممكن تسيطر على تصرفاتك و تديهم حرية التجربة و التدريب و التعلم
ليست هناك تعليقات:
إرسال تعليق