الجيل الجديد من الأباء و الأمهات مستعجل
جيل نشأ على الانترنت و ان طلبه يستجاب له بضغطة زر أو لمسة على الشاشة
جيل نشأ على الوجبات السريعة
نشأ على ايقاع سريع للحياة ...كل حاجة بتجرى ..معندوش طولة بال و صبر
عايزين يربوا أولادهم بضغطة زر
تقولى ابنى عنيد مش بيسمع كلامى أعد أقول قصيدة طويلة عريضة
فترد على تانى يوم ...عملت الى قلتى عليه و مفيش فايدة
انتى عايزاه يسمع الكلام تانى يوم علطول ؟
هو حضرتك لو بتصحى من النوم متأخر والا عندك اى عادة سيئة عايزة تغيريها ..بتعدى اد ايه علشان تتغير ؟؟؟
و ساعات تتغير و ساعات لأ
التربية عايزة طولة بال
ومعرفة و ممارسة للوسائل الصحيحة
و بعدين تعدى تعيدى و تزيدى بالاقناع و بالمحايلة و بالحزم وباثارة المشاعر و بالتدريب و الترهيب و الترغيب و الطلب المباشر و غير المباشرو تجربى وسائل متعددة
هى دى صعوبة التربية ..ان نتيجتها مش بتشوفيها بسرعة
لحد مايكبر و شخصيته تتبلور و تلاقى حاجات كتيرة من الى انت تعبتى فيها جدا برده مفيش فايدة فيها
و تلاقيه اكتسب طبائع و عادات تانية ممتازة و لا جبنا سيرتها أصلا
يا حبيبتى
انتى بتتعلمى وسائل التربية
و بتعدى تغيرى و تبدلى و تنوعى و تدعى ربنا سبحانه و تعالى
و يمكن تحصل الاستجابة و تتغرس الحاجة فيه ..و يمكن لأ
المهم نكون ماشيين صح
طول ما أولادك معاك مش هترتاحى ابدا من التربية الا لما يرحلوا بعيد عنك للدراسة او الزواج او العمل
يعنى مش هتيجى فى يوم تلاقيهم بيصلوا من نفسهم و بيذاكروا من نفسهم و بيرتبوا اودتهم من نفسهم و بيقولوا حاضر و طيب من نفسهم
دا مستحيل
وكل ما هتصلحى حاجة تطلع لك مصيبة تانية ...و كل مرحلة سنية و لها مشاكلها ...و كل ما هيكبروا هتطلع لك مشاكل جديدة ...لانهم عايشين فى مجتمع مليان فساد و مصايب
و يمكن تعدى تغرسى حاجة فى سنين ..تلاقيها تتنسف فى يوم من كلمة من مدرس والا تصرف من مدرب بيحبوه
أهم حاجة تحافظى على حبهم ليكى و احترامهم ليكى و ثقتكم فيكى علشان تضمنى انهم هيقولوا مصايبهم اول بأول
ركزى بس على انك تطلعيهم من غير عقد و أمراض نفسية ...و تنمى عقولهم بالتفكير و التدريب عليه
فالشخصية السوية نفسيا القوية فكريا هتصلح نفسها بنفسها لما تكبر
المهم نعمل الى علينا و ربنا هو الهادى
ليست هناك تعليقات:
إرسال تعليق