هو طفل يريد فرض ارادته على الجميع بالعصبية و الغضب و الصراخ و ممكن يترمى فى الارض و ممكن يكسر حاجة أو يوقع حاجة او يضرب أخوه أو يضرب مامته او يخرب حاجة عنداََ و عقاباََ لكم على عدم تنفيذ رغبته
و دا محتاج صبر أيوب لانه مستفز جدا لغضب الآباء و الامهات
لكن السر فى نجاحك معاه هو افشال خطته فى استفزازك ...
هو عنده رغبة فى الانتقام بسبب عدم تنفيذ رغبته
او رغبة فى انه يزهقك لحد ما تستجيبى ليه ...
و لما بيلاقيكى اتعصبت و صرخت و ضربت بيتبسط لانه انتقم
بس انتوا كدة بقيتوا زى بعض بالظبط و بقيتوا خالصين
وكتير الام بتريح دماغها و تروح ملبية الطلب الى هو عايزه ..و يبقى كدة نال غرضه ..و بيتعلم خلاص ان هو دا الاسلوب الامثل للحصول على مايريد فى حياته كلها
بتلاقيه فى المراهقة بيزيد اوى ...
و فى الشباب بتلاقيه زوج عصبى او زوجة عصبية ..عايز ياخد حقه بالصوت العالى و العنف اللفظى ويمكن البدنى
و عنده قناعة ان الاسلوب دا هو الى بيخلى الاخرين يستجيبوا ليه ...
و الاسلوب تتوارثه الاجيال ...
و لو زاد عن حده المعقول مع انعدام المبادىء و الاخلاق ينتج فى النهاية بلطجية و ارهابيين
السر فى تهدئة ثورة هذا الطفل هو المحافظة على هدوئك
هدوئك و طولة بالك هيخليه يفهم ان الاسلوب دا مش هينفع معاكى
لو صغير فى سن الرضاعة (اول سنتين ) ...بتكون البداية و بيجرب الاسلوب دا بيجيب نتيجة و الا لأ
اوعى تعوديه على الاستجابة لطلباته لان دا خلاص بيرسخ و يأكد الفكرة
واول ما يعيط و يصرخ خديه فى حضنك و طبطبى عليه و لا تستجيبى ابدا لطلبه
غالبا الطفل فى الفترة دى بيبقى عايز يمسك اى حاجة و لما بتاخديها بيصرخ
هو بيبقى عنده حب استطلاع رهيب لكل حاجة حواليه و عايز يجربها ..اشبعى الحاجة دى بانه يمسكها ادامك و خليها وسيلة للتعليم
لما ييجى يمسك الفازة او التحفة ..هاتيها ادامك و قوليله دى اسمها كذا ..و لونها كذا ..خليه يلمسها ..خليه يلحسها .. هو بيبقى عايز يتعرف عليها ..و لما يعرفها و يجربها خلاص شغفه ليها هيقل
لما يمسك الموبايل ..خليه يمسكه شوية و هو فى ايدك يتعرف عليه
لما يمسك ادوات المطبخ خليه يلعب بيها و يتعرف عليها عدا السكينة طبعا
المهم اشبعى رغبته فى حب الاستطلاع
و خلى الممنوعات فى الحاجة الخطر فقط
ولو الحاجة ممكن تبوظ او تتكسر خليه يمسكها و انتى معاه
و لو بيفهم فى السنة التانية هنقوله دى هنعرفها بس مش هنلعب بيها
فى هذا السن بتكون البداية ...لا تلبى للطفل طلباته بهذا الاسلوب ..
و لو فى نهايات السنة التانية و اكبر ..يعنى بيفهم الكلام كويس ..كل ما ييجى يعيط قوليله العياط و الصراخ مش هيجيبلك الى انت عايزه
و هو مع الوقت ..و مع اصرارك على ان الاسلوب دا مش هيجيب نتيجة ..بيبدأ السلوك يقل بالتدريج
ليست هناك تعليقات:
إرسال تعليق