متخليش حياتك فى اتجاه واحد
كل حياته فى شغله معندوش اى وقت للبيت ولا كأنه عايش معانا
كل حياتها مع أولادها وكانها اتجوزتنى بس علشان تجيب اولاد و بقيت دلوقت مجرد أبو الولاد و بتقولى يا بابا
مفيش فى حياته الا اصحابه البيت بالنسبة له مجرد لوكاندة للاكل و النوم
مفيش فى حياتها الا اللبس و الزواق و الميك أب و المراية و الرغى مع اصحابها
الانسان الى حاطت كل حياته فى اتجاه واحد بس انسان غير سعيد
لانه دايما عايش فى مشاكل بسبب الجوانب الاخرى الى هو مقصر فيها
الانسان السعيد دايما متوازن
صحيح بيبقى فيه جانب معين لذيذ و بيحبه و بيحب يقضى فيه اغلب الوقت
لكن لازم يتوازن علشان الجوانب الاخرى ما تقعش منه و تسبب له مشاكل و تعاسة حتى لو مش حاجة بيحبها ..بس هو مسئول عنها
والتوازن دا نوعين :
توازن نفسى : يعنى التوازن بين العقل و القلب ...
التوازن بين الجسد و الروح
بين العمل و الترفيه
بين المال و العلاقات
و توازن اجتماعى : توازن بين النفس و الآخرين
توازن بين دوائر العلاقات الى حواليه ..
بين العائلة الصغيرة و العيلة الكبيرة
بين الاصدقاء و الاهل
التوازن دا بيخليك ماشى فى كل الاتجاهات و مش مقصر فى أى منها فبتلاقى السعادة فى كل منها
بدل ما تلاقى السعادة فى جانب و تروح نلاقى النكد فى جانب تانى و تحس فى قرارة نفسك بتأنيب الضمير بسبب تقصيرك
اعمل لستة على الموبايل بكل الجوانب الى انت مهتم بيها فى حياتك
و اعمل كل يوم حاجة فى كل جانب
هتحس بمتعة التوازن
ليست هناك تعليقات:
إرسال تعليق