السعادة فى ..الزيارات العائلية
تعتمد سعادتنا فى الزيارات العائلية على علاقتنا بمن نزورهم و ارتياحنا ليهم
ساعات فيه زيارات تقيلة على القلب و لكنها واجبات و عادات اجتماعية لابد منها
و فيه زيارات خفيفة و مريحة و تجلب لنا السعادة
بمعنى ان متعة الزيارة لا تعتمد على الآخر و لكن تعتمد عليك انت و مدى ارتياحك لمن تزوره أو يزورك
عارف لو انت قلبك صافى و مش شايل من حد هتسعد فى اى زيارة عائلية
عارف لو نيتك انك تسعد الآخر و تضفى علي جو الزيارة المرح و البشر و البهجة هتكون كدة كما تريدها
لو عايز تفرح بالزيارة هتفرح بيها و تستمتع بصحبة الناس
لكن لو انت رايح و عاصر على نفسك ليمون و قاعد تنتقد الناس و تلقى بالاحكام عليهم و تفتكر لهم الى عملوه فيك من خمس سنين و مش عاجبك حد
دا دمه تقيل على قلبى
و دى انسانة هايفة و عقلها صغير
و دا انسان عديم الذوق
و دى انسانة غيورة و حسودة
و دا السنة الى فاتت قابلنى فى السوق و دور وشه
و دى من سنتين زرتها و قابلتنى مقابلة وحشة
و دا قال على كذا من تلات سنين
و دى اعوذ بالله من لسانها الزفر
و دا ......
و دى ....
يعنى رايح و انت محمل بأفكار سلبية عن الآخر ...
تفتكر هتقدر تستمتع بالوقت معاه ؟؟
و ياسلام لما تكون رايح تنتقم لكرامتك الى اتبعترت من خمس سنين ..والا تردله الموقف الى احرجك فيه
و قاعد معاه مرقد له و مستنى منه غلطة علشان ترد القديم و الجديد
نفوسنا و قلوبنا بقت وحشة أوى أوى ...و بعدين نقول هى فين السعادة دى ؟
طبعا قلب شايل احكام و مساوىء و خطايا الآخرين و شايفهم دايما وحشين و مايستاهلوش ...هيسعد فى وسطهم ازاى ؟
بداية السعادة مع أهلك
انك تطهر قلبك و انك تقابلهم وقلبك صافى و نقى
الخطأ الماضى تناساه و قول فى نفسك كل ابن آدم خطاء ..
و طول ما أنا فاكر الخطأ وانا الى تعبان ..ممكن يكون التانى و لا فاكره و لا على باله ..و انت الى قاعد تهرى و تنكت فى نفسك ..
طب ليه اعكنن على نفسى
هو انا يعنى الى معصوم من الغلط ؟؟..سامح علشان الناس تقدر تسامحك
بلاش تعد تصدر احكام على الناس ..دا دمه تقيل ..و دا متكبر ..و دا لسانه سليط ..ودا غبى ..و دا قليل الذوق ..و دا ....ودا ......
غير نظرتك و بص دايما على الجميل فيهم ..صحيح دمه تقيل بس طيب و قلبه ابيض
صحيح متكبر بس كريم و جاب لى كذا من كام سنة ..و عملى كذا قبل كدة كتر خيره
صحيح لسانه سليط ...بس صاحب واجب و عمل كذا و كذا لاخويا (مش لازم لى )
صحيح قليل الذوق ...بس عشرى و بيحب الناس
حاول تخلى تركيزك على الجميل فى الناس ..علشان تحس بجمالهم
الناس فعلا جميلة و جمالهم لايعنى ابدا الكمال ...هتلاقى اكيد فيه اخطاء و عيوب ..زى مافيك انت اخطاء و عيوب
و زى ما عايزهم يتغافلوا عن عيوبك و اخطاءك و ما يتكلموش عليك ..انت كمان لازم تكون كدة
حاول تسعدهم بكلمة مدح ..بشكر على صنيع ..بتذكر اعمالهم الحلوة و الذكريات الجميلة معاهم ..بهدية حلوة ..
زيارة خفيفة تضفى عليها المرح و لا تتكلم فيها الا بطيب الكلام ..
ماتعدش تشتكى ..و تتكلم فى المصايب وسلبيات الناس و المجتمع و البلد و الدنيا وتجيب لهم اكتئاب بعد زيارتك
انت لو اسعدتهم هم كمان هيحاولوا يسعدوك و هتكون زيارتك لذيذة على قلبهم ..و هيحبوا يعدوا معاك و لا يؤذوك
انت لو عاملتهم بصفاء قلب ..و بحسن نية ..ربنا هيخليهم كدة معاك حتى لو هم مش كدة أصلا
لو فوت ليهم اخطاءهم ..هم هيكونوا كدة معاك برده ..و لو غلطت هيلتمسوا ليك ميت عذر
لو بطلت تحكم على الناس و تشوف الجميل فيهم ..هيبقوا دايما جمال معاك
ولو حاولت تسعدهم صدقنى هتطلع أحلى مافيهم
أسعد أهلك ..تسعد بيهم
ليست هناك تعليقات:
إرسال تعليق