حضرتك بتروح شغلك كل يوم ..8 ساعات يوميا ...و ترجع البيت وعايز ترتاح و هذا حقك
تخيل حضرتك ان شغلك طلب منك تشتغلوا 16 ساعة يوميا اجبارى على كل العاملين يا أما يرفدوكم
طب تخيل لو طلب 24 ساعة يوميا
زوجتك بأة البيت دا هو مقر شغلها ..هو الشغل بتاعها
طول النهار و طول ماهى فى البيت غسيل و طبيخ و تنظيف و ترتيب و تلبية طلباتك و طلبات الاولاد ..و لو فيه طفل رعاية طفل من أكل و غيار و لعب ..ولما يكبر شوية مذاكرة وواجبات و حل مشكلات ...ولو فيه عدة اطفال يبقى كل دول مع بعض فى وقت واحد .
و ياسلام لو بتشتغل كمان ...وتعود من الجهاد الاصغر الى الجهاد الاكبر
البيت عزيزى بالنسبة ليها مش مكان للراحة زى حضرتك
هى طول ماهو موجودة فى البيت و هى بتشتغل 16 ساعة
و لو عندها طفل رضيع يعنى بتشتغل 24ساعة
وحتى لو ارتاحت و قعدت أدام التليفزيون شوية و الا مسكت التليفون و الا قعدت على الفيس ...هى تحت الطلب
يعنى زى بالظبط ماحضرتك قاعد فى البيت بس ممكن يطلبوك فى أى ووقت من ليل او نهار ...زى الدكاترة كدة ..تحت الطلب فى أى وقت
دى حاجة مجهدة جدا نفسيا ..ان مفيش وقت للراحة ..
هى محتاجة وقت تحس فيه انها غير مسئولة ...انها ليست تحت الطلب .....حتى لو خرجت بالاولاد بتكون مسئولة عنهم ..
.علشان كدة حاول تخرجها من غير الاولاد ...و اعتقد ان ساعة او ساعتين اسبوعيا مش هتخرب البيت
لو الاولاد صغيرين ....و صعب تسيبهم عند حد ...عارف لو ناموا بالليل و نزلت نص ساعة بس شربتها عصير ...و الا جبت لها شيكولاته والا آيس كريم و رجعتوا دى حاجة هتبسطها أوى
طب بلاش ..اخرجوا البلكونة أو اطلعوا سطح البيت بالليل ...بس ماتقولهاش اعملى ترمس شاى و ساندوتشات و فين الترمس و اللب و السودانى لزوم القاعدة..طلبات طلبات ...ارفع عنها المسئولية شوية ..اديها فرصة انها ترتاح نفسيا من حمل المسئولية و الطلبات
عارف مشكلتك انك حاسس ان البيت مكان الراحة بالنسبة ليك
و انها المسئولة عن البيت ازاى تسيبه و تنزل
طب و بعدين ...ماهى لازم ترتاح من الحمل شوية ..هى مش كومبيوتر ممكن يشتغل 24 ساعة ...دا حتى الكومبيوتر بيهنج ...و بيحتاج يتعمل له ريستارت
احرص عزيزى انك تعملها ريستارت كل شوية ..بدل ما تهنج ..و بعدين تشتكى انها نكدية !!!!!!!
ليست هناك تعليقات:
إرسال تعليق