أغلب شكوى الرجال من نكد زوجاتهم
و أحد أسباب النكد هى إحساسها بالقيد ..إحساسها انها مسجونة ...فقدانها للحرية ...و خاصة لو ربة بيت و انت دايما بترفض إنها تخرج
حضرتك بتنزل الشغل و ترجع من الشغل عايز تروح لأهلك بتروح ..عايز تخرج مع أصحابك بتخرج ...عايز تتفرج على التليفزيون تتفرج ..عايز تعد على الفيس تتخانق أو تكلم البنات بتعد..عايز تسافر بتسافر ..عايز تتفسح بتتفسح ...أنت حر ...بتعمل الى أنت عايزه فى أى مكان و أى زمان
لكن لو مراتك ربة بيت لاتعمل.... بتحس إنها مقيدة ليست حرة ....بتحس انها مخنوقة بمهام البيت و رعاية الاطفال و طلباتك طول اليوم فقط لاغير
حياتها كل يوم زى التانى لا جديد
تيجى تقولك أقعد معايا ...انت مش فاضى أو مش عايز ..قاعدتها مش ممتعة و بتعد تشتكى و تلومك و تنكد عليك
تيجى تقولك خرجنى ...يا منجى من المهالك يارب ..خايف من الخناقات و من المصاريف
تيجى تقولك اروح لأهلى ...مش عايزها تروح كتير لأنها بترجع متغيرة من هناك و بتحس انهم بيقووها عليك و هى بتعد تتكلم كتير عنك و عن اسرار البيت
تيجى تقولك أخرج مع أصحابى ...تحس ان اصحابها دول بيفسدوها بلاش منهم
طب اروح للجيران ...جيراننا وحشين و مش برتاح ليهم
فيه رجالة كدة ...عايز مراته قاعدة حارس البيت ماتتحركش منه ...منعا للمشاكل و الاختلاط بالناس
دا مريح بالنسبة ليك اكيد ...لكنه خانق جدا للمرأة ....ولو مش هتعرف تعوضها غياب الاهل و الاصدقاء ...يبقى مش عدل انك تحرمها كمان منهم
التجديد و التغيير مهم جدا لست البيت علشان ما تبقاش نكدية
شجعها انها تزاول اى نشاط خارج اطار الزوجية و الامومة ...فانها حمل ثقيل تحتاج ان تتخفف منه ...وزى ماحضرتك ماتقدرش تشتغل 16 ساعة يوميا هى كمان لازم تفصل و تغير ماتفضلش زوجة و أم طول ماهى صاحية ....ولو عندها بيبى بتفضل 24ساعة
ساعدها انها تخرج
ساعدها انها تمارس هواية هى بتحبها
ساعدها انها تعمل علاقات اجتماعية ..حتى لو بتعمل مشاكل بس أحسن من النكد
ساعدها انها تزاول رياضة ..و ياريت تشاركها هى كمان
ساعدها ان يكون فى يومها أى حاجة جديدة ....حرام تعد كدة تحت الطلب ....دى الثلاجة بتفصل ...اديها فرصة تفصل
لو انت راجل روتينى ...من البيت للشغل و من الشغل للبيت ...مش معنى كدة انها لازم تكون روتينية ..هى ممكن تكون شخصية تعشق التغيير و التجديد
و لو انت رجل غير اجتماعى ...مش لازم هى كمان تكون غير اجتماعية ....ولو منعتها عن الناس ممكن تصاب بأمراض نفسية و بدايتها بتكون الاكتئاب و النكد
افهم مراتك ..و راعى طبيعتها الشخصية ...وماتحاولش تخليها تبقى نسخة منك ...لانها لن تكون كذلك الا بوصلة نكد يومية
اديها فرصة تغير و تجدد و تبقى ليها اهتمامات تانية ..يا اما تستحمل النكد
ليست هناك تعليقات:
إرسال تعليق