فى اى مجال من مجالات حياتنا تحكمنا القوانين
فالقوانين هى المنظمة لحياة البشر
على المستوى الشخصى يحمل العقل البشرى مجموعة من المبادئ و القيم و المعتقدات والتى يعتبرها قوانين تحكم حياته الشخصية و تصرفاته و سلوكه
و فى الأسر الناجحة هناك مجموعة من القواعد و القوانين التى تحكم العلاقات بين الاباء و الابناء و بين الابناء بعضهم مع بعض و بين الاسرة و الأسر الأخرى
إما قواعد شرعية (الحلال و الحرام ) أو أعراف اجتماعية (العيب و الذوق )
وفى اى مؤسسة لا ينتظم العمل فيها إلا بمجموعة من القوانين توضح العلاقة بين الادارة و العاملين و تنظم علاقات العاملين و ادوارهم
والحكومة تضع القوانين المنظمة لشئون الشعب و التى تيسر حياتهم و تنظم العلاقات فيما بينهم وما بينهم و بين الدولة
فلا غناء ابدا للانسان عن قوانين .. لتسيير الحياة وحفظ الحقوق
و واحنا فى مجتمعاتنا عندنا مشكلة سلوكية كبيرة فى عدم الانضباط
و الطفل الذى ينشأ بدون قواعد ثابته طفل تائه ...غير منضبط
فالنهاردة دا غلط و بكره صح ..
و النهاردة دا غلط لو صدر منى و بكرة بابا بيعمل كدة وعادى
و النهاردة دا غلط و بتعاقب عليه و بكرة علشان ماما مزاجها حلو ممكن تعديه بدون عقاب
وانا ممنوع انى اعمل حاجات ماما ممكن تعملها عادى
و ادام الناس التصرف غير مسموح بيه مع انى بعمله فى البيت عادى
دا بيخلى الطفل تايه مش عارف الصح من الغلط ..و دا يبقى غلط امتى و دا يتعمل امتى
و بالتالى بتبقى اى قاعدة قابلة للتنازل عنها
ودا وضع بيخلى الطفل دائم الاعتراض و التمرد ....
و يزيد اعتراضاته مع تقدمه فى السن و دخوله فى مرحلة المراهقة و محاولة اثبات انه خلاص بأة من الكبار الذين لاتسرى عليهم قوانين الصغار
و تشتكى الام ان اولادها مش بيسمعوا الكلام و دا لان من البداية مفيش انضباط و تحديد لقواعد التعامل و الاصول ولا احترام ليها
وقد يخرج الطفل مضطرب مهزوز خايف يعمل اى حاجة لاتطلع غلط و حد يشخط فيه لان القواعد و الاصول مش واضحة فى مخه و بابا و ماما بحالات
عزيزى المربى
كى يكون القانون فعالا و ناجحا ابد ان يحقق الهدف منه أولا ولابد ان يحقق العدالة بين الجميع وان يعمل لمصلحة الغالبية
و ليس من المفروض ان يرضى القانون جميع الناس انه قد يكون مضرا لاصحاب المصالح من عدم وجوده بالتأكيد
و لكن المفروض ان يعلم الجميع الهدف منه ونتائج تطبيقاته الايجابية منها و السلبية
على سبيل المثال :
عندما تضع قوانين و آداب الزيارة لابنائك ..لابد ان تفهمهم لماذا ؟
لماذا لابد ان يتحلوا بالهدوء ..
لماذا لابد الا يتحركوا كثيرا داخل البيت
لماذا يقولون شكرا ان قدم لهم الطعام ..
لماذا لابد ان نحافظ و لا نلعب بأثاث البيت
.لابد ان يعلموا ان هذه الآداب حتى لا يتأذى اهل البيت من وجودنا ..و حتى يمكننا الذهاب لهم مرة اخرى ...و حتى يحبون وجودنا
و عندما تضع قوانين المذاكرة ..لابد أن تعلمهم ان هذا القانون فى مصلحتهم
انت تذاكر كى تتعلم ..و تتعلم كى تنجح فى حياتك العملية مستقبلا ...العلم مهم للعمل و العمل مهم لكسب المال و تحقيق الذات
فعندما تضع القوانين ...لابد ان يكون لها هدف مفهوم من الجميع ...ولابد ان يعلم الجميع ان هذا لمصلحتهم هم و ليس مصلحتك انت الشخصية
يعنى ماتعديش تقولى :
كنت مكسوفة منكم ..خليتو رقبتى أد السمسمة لما عملتو كذا
دا بيحسسهم انك بتحط القواعد علشان مصلحتك انت
او انا عايز اشوفك دكتور او مهندس نفسى افتخر بيك ادام اهلى و معارفى كما لو انه لازم يذاكر علشان يحقق اهدافك انت و طموحاتك انت
احترم القوانين الى انت بتحطها علشان اسرتك تحترمها
و فهمهم ليه احنا بنحط القانون دا بحيث يحقق مصلحتهم
و علمهم ان القانون ليس قيد بقدر ماهو تنظيم
قدرتك على وضع قوانين أسرية تسرى على الجميع و يحترمها الجميع و يشعرون معها بحريتهم و فى نفس الوقت بتنظيم حياتهم هو التحدى الأكبر لك كمربى
ليست هناك تعليقات:
إرسال تعليق