الطفل محتاج فى صغره يعرف الصح من الغلط ...
و يتلقى المعلومات دى من والديه ..و من اخواته الاكبر و عائلته ..
و بعدين من المدرسة ..و الاعلام ..و النادى و غيرها
فيه أطفال بيبقوا متمردين و طول النهار يقولوا لأ ...و دا لأننا طول النهار بنقول لهم
لأ كدة غلط ..فهم بيقلدونا غالبا
الطفل بعد السنتين بيبقى عايز حرية أكبر و لازم التوجيهات تقل الى اقصى درجة ممكن و نتكلم معاه كتير قبل ما نقول لأ
فيه آباء عايزين ولادهم يمشوا بالريموت من اول مايصحوا من النوم تعليمات تعليمات تعليمات افعل و لا تفعل لحد الاطفال ما بيتمردوا لأنهم نفسهم فى وقت يقضوه كما يحلو لهم و دا حقهم و الآباء مش سامحين بكدة
و عندما يصل الى سن المراهقة
بيبقى عايز دايما يثبت لنفسه و للى حواليه انه خلاص بأة راجل و عارف كل حاجة و مش محتاج حد يوجهه و هو حر
و يخطىء الآباء فى هذا السن عندما يتعاملون مع الابن انه لسة طفل صغير...ومش فاهم حاجة ...وعايزين يفرضوا رأيهم عليه
و يدخلوا مع اولادهم فى صراع ارادات ...رأى مين الى هيمشى ....هم عايزين يمشوا الصح ..و هو عايز يمشى رأيه علشان يثبت لنفسه انه خلاص كبر و بقى راجل
و يستمر الصراع طوال مرحلة المراهقة و نتيجته بتكون حسب شخصية الطفل
لو شخصيته قوية بيتمرد و يعلن العصيان على كل القواعد و القوانين الى اتحطت قبل كدة
ولو شخصيته ضعيفة بيرضخ تماما و يفقد شخصيته ويحس ديما انه محتاج حد يوجهه ..و تلاقيه راجل متجوز او ست متجوزة و مش عارفة تاخد قرار فى حياتها
المفروض فى المرحلة دى انت بتعامل ابنك كصديق حر الاختيار و رأيك بس مجرد (نصيحة من القلب )
مشكلتنا نحن الاباء اننا مش قادرين نعترف انهم كبروا و من حقهم يعيشوا زى ما هم عايزين مش زى ما احنا عايزين
مش عايزينهم يغلطوا ...و بنعتبر ان غلط الابناء فشل لينا
لو غيرت فكرتك تجاه الغلط ...
و حسيت ان الغلط دا تجربة هو بيتعلم منها كتير اكتر من مجرد التلقى ...
هتسمح ليه بانه يجرب ..و انه يغلط ..و انه يتعلم
عندما يصل ابنائى سن البلوغ ...باقعد معاهم قاعدة طويلة
انت دلوقت انسان مسئول ادام ربنا و هتتحاسب على كل صغيرة و كبيرة
و احنا أدامنا اختيارين فى اسلوب التعامل معاك
أن يكون رأيى فى أمورك مجرد رأى استشارى فقط ....و دا لو حسيت انك ناضج و اغلب تصرفاتك صحيحة ...هتدينى الثقة فيك ..و هحس انك خلاص ممكن تتحمل مسئولية نفسك ...لانك ناضج
من حقك تغلط ..فليس هناك معصوم من الغلط ...و من حقى اقولك انت غلطان و ابين و اوضح من خلال خبرتى ليه دا غلط .....فدا دورى كأم
لكن هديك حرية التصرف
لكن من فضلك ...لو لقيت ان أغلب تصرفاتك خاطئة و غير مسئولة ...فانت لم تنضج بعد و سأضطر الى انى اجبرك على تجنب الغلط و عمل المفروض ....هتعامل معاك لسة كطفل .
حياتك ادامك انت حر فيها تتحرك فيها بحريتك ....و اختيارك هو الى هيحدد ازاى هتعامل معاك فى المستقبل
هو كدة هيحاول يثبت لك انه جدع و راجل و أهل للمسئولية
ومش معنى كدة انه مش هيغلط ..اكيد هيغلط
و لما بيغلط بنعد مع بعض و بنتكلم كاصدقاء و ليس كأم و طفل ...
ان هو اقتنع باحمد ربنا
و ان لم يقتنع ...بسيبه يجرب ...
و غالبا بيرجعوا يقولولى ..كان عندك حق ياماما ....ودا هيخليه يثق فى رايك بعد كدة أكتر
امنح لابنك الثقة علشان يكون أهل ليها ..وعامله باحترام و بحب و امنحه دايما الحرية المسئولة
و خليه يقتنع بيك و بخبرتك و يثق فيك كأب صديق خايف عليه مش بمجرد الكلام ...بالتجربة العملية
ليست هناك تعليقات:
إرسال تعليق