للأسف أحد المفاهيم المغلوطة فى مجتمعاتنا المتأخرة انسانيا مفهوم الشجاعة
مفهوم الشجاعة عندنا زى مفهوم رجل الكهف بالظبط ...الى يقدر يتخانق و يدخل الخناقات و صدره مفتوح لايهاب الموت
دى كانت الشجاعة ايام رجل الكهف أماكان بيصارع الوحوش علشان يجيب لأهله الطعام
ودى هى الشجاعة وقت المعارك و الحروب
لكن الرجل الشجاع هو الرجل الذى لايكذب ..لان الكذاب انسان جبان ..خايف يقول الحقيقة ...و خايف يتحمل مسئولية هذه الحقيقة
احنا بنربى اولادنا على الكذب للاسف الشديد
شدة العقوبة و التى لا تتناسب مع عمر الطفل و لا تفكيره و لا حجم الغلط ....يعنى تلاقى الأم تصرخ و تزعق و تشتم و تخاصم و ممكن تضرب علشان وقع كوباية العصير
والا أب يزعق و يشخط و يضرب و يشتم علشان مش رادى يدخل ينام
الطفل لازم يغلط لانه طفل صغير لا يفهم و حتى لو فهم فهو بياخد وقت علشان يتعلم
و لما يكبر شوية ..بيفهم ان فيه حاجة اسمها كذب ...من مامته أو من باباه الى بيسمع كذبهم بودانه أو من اخواته الكذابين
فيبدأ يلجأ الى الكذب علشان يهرب من العقوبة ...و لو نجحت معاه خلاص عقله اتبرمج ان الكذب وسيلة للهروب من عواقب الخطأ
حتى لما بيكبر و يبقى راجل ...ومفيش عقوبة ....بس هو اتعود خلاص على كدة حتى لايفقد احترام الناس او خايف من نظرتهم ليه او من اى اعتبارات تانية
و يستمر فى الكذب لحد ما يكذب على نفسه ....و يبدأ يبرر اخطاؤه و تقصيره و سوء تقديره ...ولا يعترف أبدا انه اخطأ حتى بينه و بين نفسه
هذا الرجل حتى وان أفلت من العواقب ...و مهما حاول التبرير لنفسه ..لكنه فى نظر الآخرين الذين يعلمون الحقيقة إنسان جبان
لابد أن تعالج اخطاء الطفل بمنتهى الحكمة حتى لا يلجأ للكذب
و ياريت تبدأ انت بنفسك و تعالج كذبك أولا ....فإن الرجل الشجاع الحقيقى لايكذب
ليست هناك تعليقات:
إرسال تعليق