الشخصيات مختلفة
فيه شخصية منفتحة بطبعها ..أصدقاءها كتير ..معارفها كتير ...خدومة و تحاول تلبى طلبات الناس ...مايعرفش يعد فى البيت ...له اصدقاء بيحب يعد معاهم ....بيحب التجمعات الكبيرة ...بيحب السفر و الانطلاق ..سريع
كثير الكلام ...معندوش اسرار ...غالبا مرح و بيحب اللمة و يكره الاعمال الفردية
الشخصية المنغلقة بطبعها ..معارفها محدودين ...علاقاتها محدودة ....بيتوتى ...مالوش اصدقاء كتير هو واحد و اتنين او ملوش خالص ...مالوش فى التجمعات الكبيرة ..يعشق الهدوء ...كتوم ....حساس ...بطىء ..بيفكر كتير و قليل الكلام ....مستمع جيد ...يفضل الوحدة ......يفضل العمل الفردى
لما بيبقى فيه اختلاف بين الزوجين فى النقطة دى ...
بتعمل مشاكل كتيرة اوى بينهم لو الاتنين مش فاهمين هذا الاختلاف بينهم
على سبيل المثال :
واحد عايز يعد فى البيت علطول ..وواحد عايز يخرج علطول
واحد عايز التانى يعد معاه لوحدهم و يستمتع بهذا ...وواحد عايز اللمة و العيلة و الاصدقاء و لا يستمتع الا مع الناس
فى التجمعات الكبرى زى الحفلات او الرحلات أو تجمعات الاسرة ...واحد عايز التانى لازق فيه ما يتنقلش من جنبه ...وواحد عايز يتكلم مع طوب الارض و يتحرك فى كل الاتجاهات
واحد مش عايز كلام كتير مع الناس و متحفظ جدا فى كلامه .....و التانى مش بيبطل كلام معاهم و منفتح هزار و ضحك
واحد مش عايز مضايقات كتير فى البيت يعنى مش بيحب التليفونات و الزيارات الكتير ...و التانى بيته مفتوح و تليفونه متاح فى اى وقت
المشكل بتحصل لما كل واحد فيهم بيبقى فاكر ان التانى غلط ...
المنغلق انه كتوم ومعرفش حاجة عنه و مش بيحب الناس و لا الخروج
و المنفتح بيفشى اسرار البيت فى كل حتة و بيرغى كتير و انا محبش الانفتاح دا
و تتصاعد المشكلة لما يحاول كل طرف انه يفرض علي التانى اختياراته على انها الصح ..و عايزة يكن زيه
و مفيش مراعاة لهذا الاختلاف الطبيعى بينهم هم الاتنين ..مفيش صح و غلط
زى الموزة الطويلة الصفرا و التفاحة المدورة الحمرا ..مفيش حد غلط ..دا اختلاف طبيعى جدا بين الناس
طب نعمل ايه ؟نفهم و نعرف ان دا اختلاف طبيعى
نتفق على ان كل واحد له طبع و مش هيقدر يغيره
محدش يفرض على حد اختيارات التانى و تفضيلاته ..
كل واحد حر فى تصرفاته ....بس يراعى الاختلاف
هنتفق على شوية حاجات علشان نراعى بعض فيها
نسيبه فى حاله ووحدته و انفراده و نديله فرصة للخلوة التى يحبها المنغلق
ونعد شوية مع بعض
لما نتكلم احد هيتكلم و التانى هيسمع غالبا و دا طبيعى
ما تضغطش على الكتوم انه يكلمك عن نفسه هو لما يحب يتكلم هيتكلم
و ما تضغطش على المنفتح انه يسكت و مايتكلمش ..اسمعه على أد ماتقدر
نخرج مع بعض لوحدنا مرة (رغبة الانطوائى ) ...و نخرج مع الناس مرة تانية (رغبة المنفتح )
فى التجمعات الكبرى ...اقعد معايا شوية (رغبة المنغلق ) و انطلق مع الناس شوية (رغبة المنفتح )
نسافر مع بعض سفرية لوحدنا (رغبة المنغلق ) ..و سافر مع اصحابك سفرية
الزيارات المنزلية نقللها الى الدرجة الى يرتاحوا ليها هم الاتنين
التليفونات ليها وقت لما التانى يكون مش فى البيت او مشغول
اسرار البيت نتفق ايه الحاجة الى هى سر ما يتقلش ( رغبة المنغلق ) و ايه الحاجة الى تتقال
المهم ان الانطوائى لايفرض على الاجتماعى رغباته لانها هتحسسه انه مخنوق ..و هيقول عليه خنيق
و الاجتماعى لايفرض على الانطوائى رغباته لانها هتحسسه دايما انه مضغوط و تعبان
حاولوا توصلوا لنقاط اتفاق ترضيكم انتم الاتنين هو دا التفاهم الرائع
ليست هناك تعليقات:
إرسال تعليق