قالت : كانت بيننا مشاكل كتيرة جدا أدت الى الطلاق ...و بعدين اتفقنا اننا نرجع تانى لبعض ...تفتكرى هل ممكن ؟ و ازاى نبدأ بداية جديدة ؟
اعتقد ان فترة العشرة الى بينكم ..خلتكم تعرفوا بعض كويس أوى ...و تعرفوا العيوب النفسية او الاخلاقية الى عندكم انتم الاتنين
أول حاجة تقتلوا فكرة ان كل واحد فيكم فاكر نفسه ملاك طاهر و التانى هو الى غلطان من ساسه لراسه ...
العلاقة بينكم مسئوليتكم انتوا الاتنين ..
و فشلها برده مسئوليتكم انتم الاتنين
و نجاحها تانى مسئوليتكم انتم الاتنين
كل واحد فيكم يعد مع نفسه و يحط الغلطات الى عملها فى حياته الزوجية و أدت الى هذا الانهيار ..
لازم كل واحد فيكم يعترف بينه و بين نفسه باخطائه ....لانه لو ما اعترفش هيكررها تانى
كل واحد فيكم لازم يكون عنده قدرة انه يسمع التانى ...يعنى يسمع ايه من طباعى و عاداتى و اخلاقى مؤذية للتانى ...و يتقبل تماما هذا الامر مهما كان مش مقتنع انه غلطان
يعنى واحد مثلا بيحب يسهر بالليل مع اصحابه ..دا طبع هو حر فيه ...بس دا بيؤذى التانى بشكل او بآخر ...مش لازم تقتنع انه مؤذى ...بس دا لايمنع ان التانى سيؤذى و سيقع عليه الضرر
زى ما انت ماشى كدة و رحت دايس على رجل واحد ...
هل كان قصدك ؟ ..لأ ....
بس دا لايمنع انه اتأذى و لازم تتأسف
فيه فرق بين اقتناعك ان الطبع دا مش مؤذى ...
و ان التانى بيتأذى منه بالفعل ...
احترم مشاعر الآخر لانك كدة بتؤذيه ليل و نهار و انت مش حاسس بنفسك
بعد كدة كل واحد يحدد أمنياته ...يعنى نفسه فى ايه من الطرف التانى و بيتمنى ايه علشان يكون سعيد بالآخر
لو قدرتوا انتوا الاتنين تحددوا الحاجات دى تماما
- أنا اخطأت فى ايه من وجهة نظرى و ناوى أغيره
- أنا عايز ايه من التانى علشان احس انى سعيد بيه
- انا ايه الى بيؤذينى من الآخر و هو ماقالوش من ضمن الاخطاء الى اعترف بيها
و لو قدرتوا تسمعوا بعض و تفهموا بعض بدون تبرير للاخطاء و بدون ماتقول انت السبب ..
و بدون كبت و بمنتهى الصراحة و الوضوح ..
و بمنتهى الادب برده و بدون ما تجتروا الآلام تانى
ركزوا على المستقبل انتوا عايزين علاقتكم تكون ازاى ؟
كأنكم بتتجوزوا من أول و جديد و بتحطوا دستور جديد لحياتكم
لو قدرتوا (انتم الاتنين ) تعملوا كدة ...تتكلموا بشفافية بدون مقاطعات
تسمعوا بمنتهى التفهم بدون ما تقاطعوا الى ادامكم
و تحترموا رغبات و طلبات بعضكم
و تتعهدوا انتوا الاتنين انكم هتتغيروا و تحسنوا نفسكم
هتبدأوا تانى بداية صح
ليست هناك تعليقات:
إرسال تعليق