فيه رجالة كتير فى مجتمعنا عندها قناعة تامة ان لازم مراتك ماتعرفش حاجة عن فلوسك (لا ذهبك و لا مذهبك )
لاتعرف حاجة عن مرتبه
و لا تعرف حاجة عن مدخراته
و لاتعرف حاجة عن اى دخل ليه من مصادر اخرى
و لا تعرف حاجة عن مصادر انفاقه ..ممكن مثلا يكون بيساعد اهله و هى ماتعرفش
و دول ليهم أسباب كتير :
ممكن يكون هو أصلا كتوم و مايحبش حد يعرف عنه حاجة حتى اقرب الناس ليه مراته
ممكن يكون بخيل أصلا ..و معندوش استعداد يصرف عليها بما يتوافق مع دخله ..يعنى بيقول لها دخلى اقل بخلا عليها
ممكن يكون لاحظ من تجاربه الاولى معاها فى أول حياتهم انها أول ما بتلاقى معاه فلوس بتطلب طلبات ..فحط فى عقله انطباع انها طماعة
ممكن يكون حاسس انها بتصرف فى حاجات مالهاش لازمة فاحسن حاجة يدعى الفقر و انه مش معاه
ممكن يكون بيصرف على اهله ...او على الستات الى بيعرفهم ..او له انفاق خيرى ....و طبعا مش عايز يقولها لان دا هيعمل مشاكل
و ممكن تكون الست فعلا مادية ..و ما بتصدق تلاقى معاه فلوس و تبدأ تطلب
و فيه ست طماعة و مش بتشبع طلبات
و فيه ست عندها قناعة (قصقصى ريشه )
و فيه ست انانية الى يعوزه البيت يحرم على الجامع و على أهلك كمان
المهم أيا كانت الاسباب
الموضوع دا بيعمل فجوة بين الاتنين ...و بيحسس الست انه مش واثق فيها و دا يؤلمها
و ساعات طبعا بيكون عنده حق لو هى مادية او طماعة او انانية او رافضة انه يساعد اهله أو ماشية بطريقة قصقصى ريشه
انا شايفة ان الصراحة و الشفافية أفضل بالطبع ..انا دخلى كذا ..مدخراتى كذا ..وجوه انفاقى كذا ..
و بعدين نتفق على شوية قواعد
أولا ترتيب الاولويات :
يعنى انا دخلى كذا
أساسيات البيت : أكل و شرب و علاج و طلبات البيت زى المنظفات مثلا وفواتير (ماية و كهربا و تليفونات )..و دروس و تدريبات للاولاد
و مصروف شخصى للرجل و للست
دى الاساسيات الى بتيجى كل شهر ...
المعدل الطبيعى لانفاق الاسرة فى الاساسيات كذا فى الشهر ...
يبقى دا له الاولوية الاولى ..دا المفروض ..يتحط على جنب
بعد كدة تيجى :
كماليات البيت : ملابس و اكسسوارات للبيت او للست و برفانات و هدايا و عزومات و فسح و ...و....
ادخار
انفاق على الاهل
المفروض دى تترتب بأة باتفاقكم مع بعض ما تتسبش للظروف و الجوابات ..علشان ماتبقاش نقطة خلاف مزمنة
يعنى اجيب طقم اروح الفرح ...و الا تشترى لامك هدية عيد الام
نسافر نصيف و الا ندخل جمعية
نغير الانتريه و الا تساعد اختك فى جوازها و تجيب لها حاجة
الحاجات دى محتاجة تفاهم كبير بينكم
محتاجة عقلية الراجل الى حاسس ان مراته شريكة ليه مش عدوة عايزة تاخد فلوسه
حاسس ان مراته مسؤولة منه بدال هى معندهاش مصدر رزق تانى و بيحترم طلباتها و رغباتها حتى لو هو شايفها هايفة ...
ممكن تكون شايف ان الكريمات و البرفانات دى هيافات و هى شايفاها ضروريات جدا فى حياتها
و ممكن تشوفى ان تغيير الموبايلات و اكسسوارات العربية دى حاجة مالهاش لازمة و هو شيفها اولوية قصوى
احترموا اولويات بعض
و محتاجة ست تقدر تعب الرجال فى الفلوس دى
ست تتفهم مسئولياته الاخرى ...مسئوليته المادية تجاه اهله مثلا
تتفهم رغبته العميقة الدائمة فى تأمين مستقبل اسرته بالادخار ...
طول ما الراجل حاسس ان اسرته ممكن تتشرد لو جراله حاجة عمره ما بيرتاح و لا بيهدأ و دايما حاسس بالهم
ست تعرف الفرق بين الاساسيات الى مش ممكن نتنازل عنها و الكماليات الى ممكن تتأجل
ست تحس بجوزها ..و تحفظ اسراره المالية ...و تعرف ازاى تحافظ على فلوسه
و دول قليلين اوى فى الزمن دا
ليست هناك تعليقات:
إرسال تعليق