نشكو جميعا من تدهور لغة الحوار فى أحاديثنا اليومية فلم يعد أحد يتقبل رأى الآخر و يحترمه
لم نعد نفرق بين الحقائق التى لا خلاف عليها و نبنى عليها أفكارنا و الآراء الى ممكن نختلف فيها اختلاف كبير
و لم يعد أحد يحترم اختلاف الآخر عنه فطالما قال رأى مختلف فهو إما جاهل أو غبى أو .......قائمة من الالفاظ المنحطة
ان كنت لاتملك هذه القدرة و أى حوار مع المختلف يفضى الى نزاع و خلاف
هيبقى صعب جدا انك تعلم ابنك المهارة دى
حاول تتعلمها انت الاول ...
على الأقل حاول تدرب نفسك عليها مع ابنك علشان تكون قدوة ليه
تعلم ان تستمع الى ابنك
لما تلاقى ابنك عايز يتكلم و يحكيلك على حاجة استمع اليه باهتمام
ما تسمعش و انت وشك فى التليفزيون او اللاب او الموبايل
بص فى عينيه علشان تفهم مشاعره الى وراء الكلام
ممكن كلمة واحدة تتقال و تتسمع لكن ما يتفهمش معناها الا لو بصيت فى عينيه و شفت ملامح وشه و ساعتها هيبقى فهمك اكثر عمقا
لما تتعلم انك تحترم ابنك و تديله اهتمام لما يتكلم
هيتعلم يحترمك لما تكلمه و يبص فى عينيك
ومايجيش فى المراهقة مش عايز يسمعك و لاحتى بيبص فى وشك و يمكن تكون بتكلمه و فى ايده الموبايل بيكلم اصحابه
اديله انت النموذج و المثل علشان يتعلم استمع باهتمام
لا تتجاهل رغبة الطفل فى الكلام
الاطفال الصغار لديهم اسئلة كثيرة جدا عن الحياة الى حواليهم
كل حاجة فى حياتهم عايزين يفهموها و يعرفوها ليه و امتى و ازاى و فين
وانت لو عندك طولة بال و حكمة فى الاجابة على اسئلتهم
هتساعدهم كتير اوى فى تكبير مخهم و تراكم خبراتهم و هتحس مع الوقت ان عقلهم اكبر بكتير من اقرانهم
و ان طريقة تفكيرهم اصح كتير من غيرهم
وانك قدرت تنقل لهم خبرات كتيرة انت اخدتها
و زى ما اجسامهم محتاجة غذاء علشان تعيش و تنمو و تحافظ على صحتهم
عقولهم برده محتاجة غذاء (معلومات ) علشان تعيش و تنمو و تحافظ على صحته
حاول تجاوب عليها بما يناسبها من معلومات على قدر عقولهم
الاطفال الصغار مش بيستحملوا انشغالك و عايزين اجابات سريعة
الاطفال الكبار ممكن يتحملوا انشغالك لو مشغول فاعتذر بلطف و جاوب بعدين
ولو مش عارف قول مش عارف و بعدين دور على الاجابة على الانترنت و علمه ازاى يحصل على المعلومة الى مش عارفها
الطفل السؤول طفل ذكى و ممكن يكون عبقرى ..فلا تقتل ذكاءه بنهره و تجاهل اسئلته
أوعى تتريق عليه وهو بيتكلم ...اديله حرية الكلام تماما
ممكن يقول كلمات غلط
ممكن مايعرفش يعبر عن نفسه كويس من خلال جمل مفيدة
ممكن مايقدرش يوصل فكرته بشكل صحيح
لاتسخر من ابنك ..الأطفال الحساسين ممكن يتوقفوا تماما عن كلامك و ينعزلوا عنك بسبب ذلك
أوعى تعنفه و تنهره بسبب خطأ كلامه
لو لقيت فيه غلط فى الكلام و الاسلوب نبهه بهدوء
اسأله جبت المعلومة دى منين علشان تعرف مصدرها
أو نبهه ان الاسلوب دا غلط
لو حاول يكلمك فى وقت انت مش فاضى فيه أو غير مؤهل نفسيا انك تسمعه اعتذر بلطف
و قل له معلش مش هقدر اسمعك دلوقت ممكن نأجل الكلام بعدين لانى تعبان او مشغول ؟
حاول تكسب أولادك
و تديهم الأمان و هم بيتكلموا معاك علشان ينفتحوا عليك و يبقى سهل يقولولك على كل حاجة فى حياتهم
و لما يكبروا ماتحسش انهم انغلقوا على نفسهم لدرجة انك عايز تفتش وراهم و فى اشياءهم بسبب تصرفاتهم المريبة
لو حسوا بالامان معاك هيقولولك حتى على مصايبهم
ليست هناك تعليقات:
إرسال تعليق