قالت : حماتى تقيم معى فى بيتى بعد وفاة زوجها و تحاول فرض سيطرتها على البيت و ابنها و اولادى ..أشعر انى مجرد خادمة ليها ..
اولا : ما تندميش ابدا على سوء اختيارك لزوجك
ماتندميش على اى حاجة عملتيها قبل كدة
انت عملت الصح بالنسبة ليكى فى الوقت دا ...حسب معلوماتك و حسب تفكيرك ساعتها ..وحسب خبرتك
كلنا اخدنا قرارات غلط فى حياتنا..كلنا ..مفيش حد كان ماشى طول عمره صح ...اخطاء نتيجة جهل ..نتيجة ضعف ..نتيجة سوء تقدير ..
ودا طبيعى جدا
اوعى تندمى
والى حصل لك دا مش اختيار غلط
الابن البار بأمه دا راجل ممتاز مش وحش و اى حد هيحترمه و هيقدره
بس هى مشكلته انه مش عارف يوازن بين حبه لأمه و حبه لزوجته ..فجاى علي زوجته جامد ..ودى مشكلة اغلب الرجالة للاسف الشديد
ثانيا : شيلى من تفكيرك حكاية انك خدامة دى نهائى
دا بيتك ربنا قال ان دا بيتك (لاتخرجوهن من بيوتهن ) ..و القانون بيقول ان دا بيتك ( الشقة من حق الزوجة )..
و هى ضيفة عندك ..و انت بتأدى ليها واجب الضيافة لحد ما ربنا يجيب الفرج من عنده smile emoticon
هى مهما عاشت مش هتعيش كتير
ولما الضيف للاسف يسىء التصرف ..بنستحمله علشان هو فى بيتنا
و الحل علشان يخف الضغط شوية انك تلاقى حاجة تخففى بيها الضغط دا ..باى وسيلة ...معرفش ايه الوسيلة الى ممكن تنفع معاك
واحنا اتكلمنا قبل كدة على وسائل ممكن نعملها جوة البيت و برة البيت علشان نخف الضغوط عننا
ثالثا :انت مشكلتك الاساسية دلوقت فى جوزك ...لو علاقتكم ببعض كويسة هتهون عليكى كل دا
لازم تفهميه ان مشكلتك مش فى والدته ..مشكلتك معاه هو
انت بتحبيه ..بس عايزة تسمعى كلمة تقدير او شكر ...عايزاه يطبطب عليكى و يقولك كتر خيرك يا حبيبتى ...مش يقولك لو مش عاجبك الباب يفوت جمل
للاسف جهل وغباء و كبر و قسوة الرجالة بيخليهم يتصرفوا تصرفات تنكد عليهم عيشتهم ..
.مع ان ببعض التغيير فى الاسلوب ممكن الدنيا تكون افضل بكتير
كلميه انك محتاجة حنيته ..محتاجة شكر ..محتاجة تقدير لمجهودك ..محتاجة طبطبة .محتاجة ياخدك فى حضنه لما تكونى زعلانة من مامته و يقولك علشان خاطرى استحميلها ..انا مقدر تعبك و تعب اعصابك ...بس دى والدتى و انت زوجتى و مش هقدر اتخلى عن حد فيكم
محتاجة تحسى انه متمسك بيكى ...مش لو مش عاجبك مع السلامة
انت محتاجة تحسى ..انه ممتن لخدمتك لوالدته ..انه مش ممكن هيتخلى عنك لانه بيحبك مش علشان تخدمى والدته و اولاده ..علشان هو بيحبك و محتاجك
قوليله الكلام دا و ركزى عليه ...و خلى دا طلبك الوحيد لفترة طويلة
توقفى تماما عن رفض والدته
قوليله انا بس محتاجة منك كدا علشان اهدأ و يدينى الطاقة على الصبر
توقفى تماما عن طلب الانفصال عن والدته ...لان دى حاجة بتجننهم
توقفى عن الشكوى منها ..لان هيطلعك انت الى غلطانه
توقفى عن الشكوى من التعب من ضيوفها و اهلها ...لان دا بيستفزه
ركزى على ما تحتاجين اليه تحديدا ...
وياريت الرجالة يفهموا
يفهموا ان خدمة والدتك مش واجب على زوجتك ...و ان دا ظلم ليها لما تغصبها على حاجة زى دى
هى بتعمله تفضل ..و التفضل بيحتاج شكر و تقدير ..
بيحتاج هدايا و فسح وعطف و دلع و طبطبة وحاجة تخليها تستحمل
مش هيبقى انت و امك عليها
حراااااااام ...دا ظلم و استعباد
و صدقنى مسيرك هتعانى من ظلمك دا ...هتلاقيه فى شغلك ..و فى نكد مزمن فى بيتك ..و فى اولادك
وطول ما انت فاكر انك بتبر والدتك بظلم زوجتك ...طول ما السيئات يذهبن الحسنات
هتلاقى الظلم ضيع ثواب البر بأمك و تيجى يوم القيامة مفلس
قال رسول الله صلى الله عليه وسلم : (( أتدرون ما المفلس ؟
قالوا: المفلس فينا من لا درهم له ولا متاع
. فقال: إن المفلس من أمتي يأتي يوم القيامة بصلاة وصيام وزكاة ، ويأتي قد شتم هذا، وقذف هذا، وأكل مال هذا، وسفك دم هذا، وضرب هذا، فيعطى هذا من حسناته وهذا من حسناته، فإن فنيت حسناته قبل أن يقضى ما عليه، أخذ من خطاياهم فطرحت عليه ثم طرح في النار)).
وانت أتيت ببرك بأمك ...و أسأت معاملة زوجتك بالكلام الجارح و الضرب و الاهانة و التهديد بالطلاق و الحرمان من اطفالها
اتقوا الله فانها انتقلت الى بيتك لتكرمها ...مش علشان تهينها
ربنا ينتقم منكم
ليست هناك تعليقات:
إرسال تعليق