لم نتعلم منذ الصغر كيف نتخذ قراراتنا ..و كيف نختار بين متعدد
كانت ماما وبابا هم دايما الى بيختاروا ...بيختاروا هدومنا ..بيخاتروا لعبنا ...بيختاروا القنوات الى نتفرج عليها والاعمال الدرامية ...بيختاروا المدرسة و بيخاتروا الشنطة و الجزمة و الاقلام و المسطرة و المحاية
وفى الامتحان مابنعرفش نختار السؤال الاختيارى فبنحل الاتنين
و لو سؤال اختيار من متعدد بنختار ب( حادى بادى كرنب زبادى )
بيختاروا أصحابنا ..العب مع دا و ماتلعبش مع دا
و لما بنكبر شوية بيخاروا هناكل ايه و هنشرب ايه و هنخرج فين و هنصيف فين و هنخرج مع مين ...
و لما كبرنا كمان هم الى اختاروا الكلية الى دخلناها ...و الشغل الى اشتغلناه ...و شريك الحياة الى اتجوزناه
دنا بشوف نساء زوجات و أمهات مش بتعرف تختار ملابسها الداخلية ولا طلبات بيتها الا لما تيجى ماما
و شباب لسة ماما الى بتختار له العروسة و الشقة و أثاث البيت
القدرة على اتخاذ القرار و الاختيار بين البدائل قدرات عقلية لم نتدرب عليها نهائى ...لان كان دايما فيه حد بيختار لنا
و لما الانسان دا بيكبر شوية بيفضل محتار و متردد و مش عارف ياخد قرار فى حياته و خاصة لما يبعد من كان يختار له سواء كان أم أو أب أو زوج بموت أو سفر
بيحس انه تايه فى الدنيا من غيره ...ضايع ...زى الطفل الضايع من أمه
او بيفضل منتظر منتظر لحد ما ربنا يختار (كما يدعى ) و تضيع عليه فرص كتيرة بسبب تردده
الاستخارة مش معناها انى اقف فى مكانى استنى ربنا هيختار لى ايه
الاستخارة انى اقرر و اختار و اشوف ربنا هيمشى الموضوع و الا هيقف
و الطبع الفرعونى الدكتاتورى المتأصل فى جيناتنا الوراثية والى مصور لنا اننا بنختار الأفضل لاننا بنحب اولادنا و احنا الأدرى بمصلحتهم و الأعلم بما ينفعهم هو ما يؤدى الى خلق مثل هذه الشخصيات
شخصيات لا لون لها و لا طعم و مالوش رأى
أو شخصيات إمعة تمشى وراء كل ناعق و تسلم عقلها ليه
عايزة ابنك يبقى راجل خليه يختار بنفسه من صغره
حطيله قواعد و سيبيه يختار على أساسها
او خليه يختار بين متعدد و دربيه على كدة
يعنى لو طفل صغير مايعرفش لسة ...اختارى تلات اطقم هدوم حلوين من وجهة نظرك و خليه يختار منهم
اختارى كذا لعبة ..و خليه هو يختار
اديله كذا نوع فاكهة مثلا ..و خليه يختار
لو كبير شوية حطيله قواعد و أقنعيه بيها و خليه يختار على أساسها
يعنى مثلا :
قواعد لاختيار الاصدقاء ..مايكونوش مؤذيين و مؤدبين ..مثلا
قواعد لاختيار الحذاء ..يكون مريح ..لونه غامق...مثلا
قواعد لاختيار شنطة المدرسة
دربى ابنك على الاختيار و اتخاذ القرار ...و ساعديه على التفكير ازاى يختار و على أى أساس ...و اوعى تتدخلى فى اختياره لمستقبله ...كليته او عروسته او شغله ....
لو دربتيه صح فى صغره ...هتكون اختياراته موفقة فى كبره
و اعملى حسابك ان مهما طال بيكى العمر فانك ميتة .....واعملى حساب اليوم دا ...و بطلى تسلط و اعتقاد انك بتختارى ليه الأصلح
انه يختار غلط و يتعلم خير له من أن يكون أمعه ومالوش رأى ..انت مش هتعيشى له طول العمر
ليست هناك تعليقات:
إرسال تعليق