مشكلة يومية تعانى منها الامهات ..و هى عدم التزام الابناء بالصلاة و خمس خناقات يومية لكل فرض
أولا : لازم تفهمى ان دا شىء طبيعى جدا لايستحق النكد الى انت عاملاه دا ....اسألى نفسك انت شخصيا ..امتى التزمت بالصلاة ولوحدك ؟
اسألى اى أم ..اخبار ولادك ايه مع الصلاة ؟
اسألى عيلتكم نفر نفر الكبار قبل الصغيرين ..اخبار الصلاة معاكم ايه ؟
هتلاقى المنتظمين فى الصلاة قلة قليلة ...و هتلاقيه انتظم لما كبر ووصل لمرحلة معينة من عمره ...فمش عايزاك بداية تعمليها ازمة
لو انت ربتيه صح ...هيلتزم بيها فى وقت ما ...الله اعلم متى..ممكن يكون فى طفولته ...فى شبابه ..ممكن يكون فى كهولته .. ..بس هتلاقيه لوحده كدة انتظم ..فانك لاتهدى من أحببت و لكن الله يهدى من يشاء
ثانيا : الصلاة علشان تترسخ عند الاطفال محتاجة شغل علىه من الصغر على عقله و قلبه و روحه و تدريب لجسده ...لو انت اشتغلتى على الاربعة هتلاقى النتيجة قريبة لكن لو اشتغلت على حاجة واحدة بس النتائج بتكون صعبة
لازم الطفل يقتنع احنا ليه بنصلى (العقل )
لازم الطفل يحب الصلاة ( القلب )
لازم الطفل يحس يعنى ايه صلاة (الروح و الضمير )
و لازم يتدرب على ازاى يصلى (الجسد ) ....
للاسف احنا غالبا بنشتغل على الجسد بس ...فمش بنجيب نتيجة
ثالثا : اسلوب فرض الصلاة بالعافية و الخناق المتواصل معاه بسببها هيخليه يكره الصلاة (يعنى القلب رافضها ) ..و ممكن يكذب و يقولك صليت ...و أول ما يوصل للمراهقة مش هيصلى خالص لانه كرهها ...
ثالثا : الاسلوب الامثل هو انك تتكلم معاه فى اهمية الصلاة و منزلتها فى الاسلام
و اقناعه بالعقل انها التواصل الوحيد الى بينك و بين ربنا ...
ولو بتحب ربنا مش هتخاصمه ...تقدر تخاصم ربنا و ماتكلموش ؟
هو بينادى عليك و بيقولك حى على الصلاة و انت بتقوله معلش مش فاضى ورايا موبايل ..ورايا فيلم كرتون ..تفتكر ربنا كدة هيبقى فرحان بيك و بيحبك
شوف ربنا عملنا أد ايه نعم لاتعد و لا تحصى و بعدين يبقى جزاته انى اقوله اصل نسيت اكلمك
بتكلم صاحبك كام مرة فى اليوم ..و مش عارف تكلم ربنا
و هكذا بالاسلوب دا بتشتغلى على عقله و ضميره
خليه يشعر انه لما بينتظم ربنا بيحبه
شوف جبت درجات كويسة ازاى لما انتظمت ..شوف جات لك اللعبة الى كان نفسك فيها ازاى لما انتظمت ..خليه يحس دايما بفضل ربنا عليه علشان يحبه و يحب التواصل معاه
دا طبعا لو بيحب اصلا ربنا و ماكرهناهوش فيه بالتذكير بالنار و العقاب و عذاب القبر والحاجات الى بتكره العيال فى ربنا و الصلاة اصلا
و بعد ما تتكلم .تقول له انا واثق انك مش هتنسى الصلاة تانى و انك هتهتم و تظبط الموبايل على الاذان علشان تقوم تصلى ..انا عارفة ابنى حبيبى ربنا بيحبه علشان انت خلوق و شاطر و بتبر ابوك و امك و اكيد ربنا هيساعدك و تفتكر
لما ينسى بلاش تقولى قوم صلى باسلوب آمر منفر متحفز
قوليله انا هصلى ياحبيبى تيجى معايا ...خلى فيه آذان فى البيت من موبايلك او الكومبيوتر
لو لقتيه انتظم فترة عبريله عن شكرك و تقدريك و امدحيه ادام باباه و خليه يحس انه عمل حاجة كويسة
المهم نبطل اسلوب الامر و التهديد و الغصب و العقوبات ..لان دا اسلوب منفر جدا
ليست هناك تعليقات:
إرسال تعليق