ابنائى مسئوليتهم بتزيد

مسئوليتهم بتزيد مش بتقل ..كل ما بيكبروا بحس بحملهم اكتر

للأسف تشكو الكثير من الامهات من هذا الامر ...
و أنا شخصيا أعتبر أن هذا علامة من علامات فشل الابوين فى تربيتهم

المفروض و الطبيعى انه كلما كبر الابناء و تجاوزوا مرحلة الطفولة ..كلما قل اعتمادهم عليك الى حد كبير ...لحد مايوصلوا لسن معين يكونوا فيها مستقلين عنك تماما

كلما نجحت فى جعلهم اشخاصا مستقلين ناضجين ..دا يدل انك دربتهم على مواجهة الحياة لوحدهم و هو دا الهدف من التربية

التربية مش هى انى اسعد اولادى ..التربية انى اخليهم شخصيات قادرة على جلب السعادة لأنفسهم

التربية مش أنى أريح ولادى و اعيشهم فى رفاهية و راحة ...التربية انهم يتعودوا على مواجهة الحياة بصعوباتها و مشاكلها

التربية مش هى انى انجح ولادى بالعافية ...وساعات برشوة المدرسين و شراء الشهادات ...التربية انى اخليهم شخصيات قادرة على احراز النجاح بانفسهم

التربية مش انى اخليه مرتبط بى ..معتمد على نفسيا و ماديا ...التربية انى اخليه انسان ناضج مستقل ناجح سعيد فى حياته

التربية مش انى اخليه ولد مطيع هادىء بيسمع الكلام و ما يقدرش يخالف لى كلمة حتى لو راجل كبير والا ست كبيرة و متجوزة  و مخلفة
التربية انى اعلمه كيف يوازن بين اختياراته و ارادته هو فى حياته و احترمها تماما
و بين البر و حسن الخلق فى تعامله معى و ليس طاعتى .

انت  مش هعيش لابنك  طول عمرى ...و طول ماهو معتمد عليك و حاول يستقل  هيفشل و مش هيعرف ياخد اى قرار فى حياته
و حضرتك مش هتعيش له طول العمر

سيبوا ولادكم يتعلموا و ينضجوا و يقعوا و يفشلوا أحيانا و يواجهوا الحياة و انتوا معاهم ..جنبهم بتشجعوا و توجهوا و تشيروا ..مش أدامهم بتجروهم وراكم

علشان مايبقوش دايما حاسين ان عليهم قيود نفسية مانعاهم من انهم يحسوا بحريتهم النفسية و بثقتهم بنفسهم و مانعاهم من التجربة و اكتساب الخبرة بانفسهم